Usurbilgo Udarregi ikastolan bi gurasoren kezkatik abiatuta, ikastetxeko guraso elkarteak proiektu bat garatu du seme-alabei telefono mugikorra zein adinetan erosi eztabaidatzeko eta zehazteko.

Gaiaren inguruan ikasleak eta gurasoak formatzen dabiltza, eta Argia-k jaso du hiru hilero negoziatzen dutela gurasoek haurrei mugikorra ematea beste hiru hilabetez atzeratzeko proposamena. Bertan adierazi dute baietz adostu dutela LH 5 eta 6. mailako gurasoek.

Hortik tiraka, Puntua aldizkarian eztabaida zabaldu eta lau pertsonen iritziak jaso dituzte. Guraso askoren kezka da haur eta nerabeei mugikorra eskura jarri behar zaien, eta zenbat urterekin. Onura ugari dakartzan arren, arriskuak ere baditu teknologiak. Zer komeni da? Hau jaso dute.

Jone Zalduegi, Emoki elkartea

“Askotan errezeta magikoak nahi ditugu eta datu zehatzen bila eta informazio ugariarekin bizi gara. Gakoa ez da adin zehatz batekin mugikorra eskuratzea, baizik eta haurraren heldutasun mailaren arabera erabakiak hartzea eta erabaki kontzienteak hartzea”.

Igone Osinaga, gurasoa

“Oso zaila da ume bati mugikorra uzteko une egokia zein den jakitea, bakoitzaren egoeraren arabera erabaki behar da, batzuetan lehenago eta bestetan beranduago. Garrantzitsuena ez da adina, mugak non dauden erakustea baizik”.

Jorge Flores, Pantallas Amigas

“Adin egokia baino, momentu egokia dago: gurasoak harekin behar bezala eta progresiboki laguntzeko prest daudenean. Haur eta zirkunstantzia guztiak ez dira berdinak, eta egun 12 edo 13 urte bete baino lehen, aukeren eta desabantailen arteko balantzea negatiboa da”.

Miren Ros, Familia Bidelagun elkartea

“Guretzat aproposena hamasei urterekin da. Adin horren aurretik, ume edo gaztearen garuna ez dago prest mugikor bat bezalako bonba kudeatzeko. Gaur egun ere heldu asko ez bagara erabilera egoki bat egiteko gai, nolatan egingo dute gure haurrek?”.