Kolaborazio zaharrei hautsa astintzen gabiltzanez, 2010eko kolaborazio bat igo genuen aste bukaeran. Seme alaben patiduak ikustera joaten diren gurasoez. Josu Murgoitio eta Borja Munoa ziren  gaia jorratzen zutenak.

Goiza pasatzera

Hau da larunbatero edo igandero gehien entzuten duguna agurrarekin batera gure seme edo alabaren partidura goazenean, hau da politikoki zuzena dena. Partiduaren emaitzaren arabera, baina, zeharo aldatzen zaio zentzua esaldi horri. Gure seme-alabak partidua duten larunbat edo domeka bateko kronika da hau.

Adibide honetarako berdin dio kirolak, baina futbola bada ondoren aipatuko ditugun emozio primario hauek hobeto ikusten/azaleratzen dira.

Beroketa arin baten ostean partidua hastear  da. Goiza pasatzera joan den ikusle-jendea ere hasi da berotzen.

Jokaldiak eta denborak aurrera egin ahala, tenperatura igotzen  doa. Hasiera baten guraso bakoitzak bere seme edo alabaren gainean begiak jarri eta animoak, noiz behinka ahots presionatzailearekin eta errime xamar: zaindu hori!  Heldu beste  horri!  Jaurti, jaurti!  Eta hantzeko konsignak, tarteka jokaldi on baten ostean txalo zaparradaren bat edo beste.

Baina partidua aurrera doa eta markagailuak ez du “goizpaseroentzat” emaitza onik adierazten. Orduan termometroak beste gradu batzuk egiten ditu gora; buuff!! egiteko ordua iritsi da, jada ez diogu bakarrik gure oinordekoari so egiten, gure begiradak arbiotroari begira hasiak dira. Ordura arte ez gara ohartu ere egin nor zen epaile lanetan ari zena baina oraingoan atera diogu erradiografia antzeko bat.

Markagailua ez dago gure alde , beste taldea ondo ari da eta gu ordea … komeriak burua altxatzeko ere. Ingurukoek entzuteko moduan arbitroaren erabaki bakoitzaren ondoren komentarioren bat egiteko unea iritsi da:Nora begira dago hori? nor da kalamidade hori? (eta ez du ezagutuko baina jakin badaki gaurkoan partidua arbitratzea egokitu zaion guraso bat dela, bolondresa), minutuak aurrera egin ahala baliteke epailearen erabakien kontura beste taldeko gurasoren batekin hika – mikaren bat izatea, bankilloan dauden haurrak ez badute ezer entzuten gaitzerdi …

Partidua bukatzear dago eta ez dago hau altxatuko duen gizasemerik. Markagailua gogorra da eta honek ez du haurren jarrera onik eta partaidetzak adierazten;  horrek saskiratzeak edo golak edo kintzeak baino ez ditu islatzen, entrenatzaileari egurra emateko ordua heldu da, honi ere iritsi zaio txanda:Zergatik ez du atezain bestea jarri? zein sistema erabiltzen ote du tipo honek? Beste horrek jokatu behar zuen! Rotazioen sistema hau … ez dakit ba!(hau Barsa-ren eraginez) eta gehiago. Izan ere, kirolari buruz batzuk gara nozio batzuen jabe, gehienok jakitun.

Bukatu da larunbateko euskal kirolarien rituala, entrenatzaileak animozko hitz batzuk eta hurrengo entrenamendura arte, haurrek beste taldekoei eskua emango diete eta dutxatik irten arte eta gurasoen aurpegia ikusi arte ahaztuta izango dute jipoia jaso dutenik ere. Hauen aurpegiak beste komentario batzuk eskatzen ditu baina horrek luze joko luke , erremate moduan akaso 4-5 aldiz erantzun beharko dio: zer egin duzue? galdu?

Espektakulu hau bizitzera behartzen ditugu haurrak, haur hauek esaten zaiena baino gehiago ikusten dutena egingo dute, eta hala ere, kosta egingo da jarrera eredugarririk ikustea nerabezaroan adibidez. Zeren eta haur hauek egunen batean nerabeak izango dira, bizipenen arabera erantzungo duten gazteak, esperientzien arabera kontzientzia landuko dutenak. Jarrera hauek ez dute lekurik izan behar gaztetxoen kirol bizitzan.

Gure seme alabak ezin dira izan gure frustrazio eta etxeko miseria guztien sendagarri, zaldi horretan ezin ditugu jarri gure esperantza guztiak.

Akaso artikulua bukatzeko gogor xamar geratzen da baina mundu honetan atzera-aurrera urteetan gabiltzanok sarri hitz egiten dugu gurasoen edo senideek haurrekiko dituzten espektatibez. Kirola berez helburua den edo pertsonak gizarteratzeko tresna bat den edo biak batera, aspaldiko eta betiko debatea da. Eztabaida honetan denok dugu zer esanik baina bidea argitu arte ezin esan “goiza pasatzera” goazenik. Goiz-pasa joatea beste kontu bat da.