Etxeko txikiak eta aldaketen inguruan mintzatu da Leire Azpiazu erizaina bere sare sozialetan. Hasieratik garbi utzi du helduok aldaketetan sufritzen dugun bezala, haurrei ere eragiten dietela.

Aldaketa horiek hainbat izan daitekez erizainaren ustetan: mudantzak, neba-arrebaren jaiotza, eskola aldaketa, gaixotasuna, familiako kide baten heriotza, gurasoen banaketa…

Baina aldaketa horiek nola antzeman daitezke? Azpiazuk adierazi duenez, jokaeran ikusiko dira aldaketak: dagoeneko egiten ez zituen gauzak egiten hasiko da berriz —gainean pixa egiten, jateko laguntza eskatzen…—, haserrea agertuko du, hatza miazten hasiko da…

Dioenez, sintoma horiek sei hilabete baino gutxiago irauten dute, baina denbora gehiago ere pasa daiteke.

Laguntzeko, Espainiako Pediatria Elkartearen arabera, hurrengo pausoak jarraitu beharko lirateke:

  • Konfiantza eta denbora eskaintzeaz gain, egoeraz hitz egitera animatu.
  • Bere tristura onartu, ez saihestu edo ez ikusiarena egin.
  • Pazientzia izan, haur bakoitzak bere denbora behar du.
  • Ez babestu gehiegi haurra, bere kabuz ikasi behar du egoera txarrei aurre egiten, eta horretarako modu bakarra berak aurre egitea da.

Azpiazuk aurreratu duenez, ordu-aldaketa izan daiteke hurrengo aldaketa: “Hari aurrea hartzeak zure seme-alaben egitura hobeto kudeatzen lagundu diezazuke. Baina neguko ordutegi berria egokitzea erraza izango dela uste baduzu, ez duzu aurre hartu beharrik”.