Bizipoza jaia, elkartasun festa handia ospatu zen atzo, Amasa-Villabonan. Goizean goizetik hasi zen festa usaina Villabonako herrian, Loatzo musika eskolako lagunekin kalejira hasi baitzen herrian barrena.

Jende andana bildu zen egun osoan eta parte-hartzea ikaragarria izan zen. Bizipoza Elkarteak biltzen dituen elkarteek euren postuak ezarri zituzten plazan eta postuetara jende mordoa hurbildu zen kamisetak, txapak, oroigarriak, banderak eta hainbat eta hainbat produktu erosi eta informazioa jasotzera.

Jaia hasi eta ordubetera Goizeko ekitaldi itxaroena hasi zen, Go!azen-eko lagunek emandako ikuskizuna. Plaza erdian jarrita kantuan eta dantzan aritu ziren haurrak adi-adi zituztela. Hartu-emana zoragarria izan zen eta haurrek ez zuten ikuskizuna amaitzeko inongo presarik izan. Ikuskizuna amaitu ostean ilara luze, amaigabea sortu zen Go!azeneko lagunekin argazkiak ateratzeko.

Ikuskizunik ez zen falta izan, jarraian, Besamotza konpartsako erraldoi eta buruhandiekin kalejira egin baitzen. Haur eta gurasoak poz-pozik atzetik jarraika ibili ziren, ondoren, eskulanetan eta haurren jolasetan geldialditxoa egiteko.

Hiru postu desberdindu ziren: Saharako postua; bertan, Hennarekin eskuetan irudi desberdinak sortzen aritu ziren baita Saharako arropak jantzi eta produktuak dastatu ere. Ondoan, eskulanen gunea zegoen eta senideei zein lagunei marrazki koloretsuak oparitzeko aukera sortzeaz gain, aurpegi koloretsuak marraztu zituzten; piratak, animalia xelebreak zein pailazoak nagusitu ziren. Eskulanetan aritu nahi ez zuenak ere izan zuen bere tartea jolasteko, eta Irrika Aisialdi taldekoekin korrika ibili ziren alde batetik bestera.

Eguerdian, Kantujira iritsi zen plazara eta herrian barrena kantuan aritu ziren Aiztondo, Irura eta Anoetako abeslariak, Kukua abesbatza eta Asteasuko abesbatzarekin batera. Kantujira amaitu ostean, eskertza eta aitortza ekitaldia hasi zen eta eszenatokira Bizipoza elkartea osatzen duten elkarte guztiak igo ziren, baita Bizipza Jaialdia aurrera eramateko lagundu duten udal ordezkariak ere.

Gosea nabaritu zen eskertza ekitaldia amaitu orduko eta Etiopia Utopiak jarritako txosnetan ogitarteko handi zein pintxo zaporetsuak jateko aukera egon zen. Bertan lauzpa bost aukera eman zituzten eta lasai eserita eta itzalean egoteko eremu lasaia bihurtu zen.

Behin sabelak beteta eta indarrak hartuta, Eresargi abesbatzako lagunen ekitaldi ederra egokitu zen, euskal kantu ezagunak melodia eta ahots goxoekin abestuaz. Eta amanaldi honekin amaituta, arratsaldean jaia lekuz mugitu zen, ekaitza iragarrita baitzegoen. Hortaz, Errebote plazatik Bear zana frontoira egin zuten salto.

Frontoian, euskal pailazoen txanda izan zen eta Pirritx, Porrotx eta Mari Motosek frontoia gainezka jarri zuten. Haurren aurpegietan gozamena besterik ez zen nabaritzen eta irri, kantu eta dantzarako saio luzea izan zen. Emanaldia amaitu eta hurrengoarekin jarraitu bitartean, txokolatea eskaini zuten Etiopia Utopiako kideek eta behin merienda goxoa hartuta berriro ere frontoian Ndank Ndank elkartearen musika emanaldia izan zen. Poliki-poliki hasi zen taldea “Ndank” hitzak dioen bezala, baina, kantu pare baten ostean, giroa berotua zegoen. Azkenik, eguna borobil amaitzeko Zigor DZ aren saioa izan zen  eta plaza guztia dantzan jarri zuen euskal musika eta kantu modernoak uztartuz.