Aramaioko jolasgune eder bat proposatzera gatoz gaurkoan. Araba iparraldeko udalerria da Aramaio. 1400 bat biztanle ditu eta Zuiako kuadrillakoa da. Gasteiztik 29 bat kilometro iparraldera dago eta Gipuzkoarekin mugan; izan ere, Arrasatetik 8 kilometrora dago.

Herri lasaia da Aramaio eta aisialdirako aukera asko eskaintzen ditu. Eskola ondoan dago zume-bizi izeneko jolasgunea. Herritarrek “Bañera parkea” ere esaten diote; izan ere, garai batean bainuetxe bat zegoen bertan eta oraindik ere ikus daitezke bainuetxearen harrizko bañerak.

Gaur egun desagertuta dago bainuetxea eta eskola dago gertu. “Eskolatik eraiki dugu jolasgune berde hau. Urtean zehar, zumeak dituen aldaketak ikusteko aukera emango digu. Udaberrian kimu berriak jaioko dira, udan loratu eta neguan hostoak eroriko dira”, irakur daiteke parkearen aurkezpen kartelean.

Eskola egunetan eskola-umeen jolastokia da zume-bizia jolasgunea. Ziburuak, tirolina bat, inguruko txirrista luzeenetakoa, egurrezko estrukturekin osatutako jolastokia, antzoki txiki bat, jolaserako txalupa formako estruktura, eta zume-biziko eraikuntza ditu. Iturria, mahaiak eta eserlekua ere baditu. Mahai teniserako mahaia, eskaladarako horma eta ur-txorroten gunea ere baditu.

Aramaio inguruan bazaudete, ez izan zalantzarik. Leku aproposa da jolaserako.