Familian egin daitezkeen proposamen ezberdinak dituzte Gipuzkoako parketxeek gipuzkoanatura.eus atarian dituzue guztiak ikusgai.

Hona hemen datorren asterako bi proposamen Zaldibia eta Ataunetik abiatuta.

LIZARRUSTIKO PAISAIA EHUNDU DUTEN ZUHAITZ MAGIKOAK

Landareen alderdirik gizatiarrena ezagutzeko ibilaldi gidatua

Gure basoak leienda ugariren iturri izan dira, eta sinesmen zaharrak iruditzen zaizkigun arren, paisaia ikusteko dugun moduan eragiten jarraitzen dute. Horren adibide, gure arbasoek sakratuak kontsideratzen zituzten hainbat landare ditugu.

Landare hauek ezagutzeko, Aralarko parketxeak ibilbide eroso bat proposatzen dizu. Lizarrustiko aparkalekutik abiatuta, Alleko mendiaren magaletik doan pagadian zehar ibiliko gara, berriz ere Lizarrustira itzultzeko. Hitzordua uztailaren 31n izango da, goizeko 10:00etan.

Izena ematea derrigorrezkoa izango da.

OSINBERDEKO ERREKA: EZKUTUKO PARADISU TXIKIA

Urak sorturiko paisaia harrigarriak ezagutzeko ibilbidea egingo da Zaldibian

Aralar bezalako sistema karstiko batean, ura bere barrunbeetan pilatzen da. Hala ere, tarteka lur-azpitik atera eta erreka eta osin ederrak sortzen ditu. Uraren indarra erakusten duten adibide hauetako batzuk Zaldibiako Arkaka inguruan ditugu.

Uztailaren 27an, bertako altxorretako bat ezagutzeko aukera izango dugu Aralarko parketxearen eskutik. Horretarako, Arkakako aparkalekutik hasi (errepidea amaitzen den lekutik), eta errekak eginiko bidea jarraituz Osinberdeko putzuraino iritsiko gara.

Ibilbideak bi kilometro eskas ditu (km bat joateko eta beste bat itzultzeko), zailtasunik gabekoa da  eta adin guztietara zuzenduta dago. Bertako hidrologia eta horren inguruan sorturiko kultura izango dira hizpide, abeltzaintza eta leku-izenak tartean. Gainera, amaieran bainu bat hartzeko aukera egon daiteke.

INFORMAZIO GEHIAGORAKO ETA IZENA EMATEKO:

barandiaran@gipuzkoanatura.eus

943180335 / 688895069