Zaldibia Herri Hezitzailea gizarte ekimena gidatuko duen talde eragilea aurkeztu zuten irailaren 13an Zaldibian, baita taldeak prestatu duen lehen proiektu bera ere. Karreane kultur etxearen aurrean, 17:00etanizan zen ekitaldia. Zaldibiako hainbat eragilek osatu dute taldea. Herri mailako prozesu bat eta gero bi proiektu sortu eta jarriko dituzte martxan. Talde eragilean Gurasoak, Eskolako irakasleak, Udal ordezkari eta teknikariak eta herritarrak daude. Herri modun zein baliotan hezi nahi duten hausnartu eta ekimen zehatzak sortzeko bokazioz.

Ipuinak eta jolasa ardatzak

Galtzen ari diren balio, jokabide eta ohitura batzuen kezkatik abiatu dute ekimena, herriko sarea, kolektibitatea eta jarrera aktiboa lehenetsita. «Gizartearen joera eta teknologia berriak herri txikietan eragin zuzena izaten ari direla ohartu gara, eta horrek erronka berriak sortu dituela Zaldibian. Badago herriarekiko atxikimendua galtzeko arriskua», ohartarazi dute. Izaera herrikoia duten ekimenak sustatuko dituzte, haurrak eta gaztetxoak «herriko parte sentitzeko». 

Hala, Ipuin Kontaketa Herrikoia da berritasun bat. Irailetik aurrera, hileko azken asteazkenean 16:30ean, zaldibiarrak ipuinak edo historiak kontatzen jarriko dizkiete haurrei. «Ahozkotasuna da egitasmoaren ardatza, eta formatu irekia izango du». Edadekoek bezala kanpoan jaiotako herritar batek bere ama-hizkuntzan konta dezake zerbait. 

Bestetik, Jolasa Plazara ekimena sortu dute, hileko bigarren ostiralean 17:00etan garatzeko. Jolas librerako materiala emango zaie haurrei, eta jolas gidatuak antolatuko dituzte boluntarioek. «Teknologia berriak nagusi diren garai honetan, garrantzitsua iruditzen zaigu betiko kaleko jolasak berreskuratzea eta sustatzea, beti ere euskara oinarri hartuta».  Jolas librerako elementuak eta materialak biltzeko ere “karro” berezi eta ederra sortu dute herrian. Hilabetan behin irtengo da plazara jolasa ahalbidetu eta sustatzeko asmoarekin.

Liburu txokoa muntatuko dute

Bi ekimen horiekin batera, leku fisiko bat ere atonduko dute, Karreane kultur etxeko erabilera anitzeko beheko aretoan: haurrentzako bereizia eta berezia izango den Liburu Txokoa. Udal liburutegian haurren liburuen mailegu zerbitzua badago, baina haurrek euren artean edo gurasoekin lasai irakurriz egoteko tokia prestatuko dute, 1-8 urte bitartekoentzat. «Haurren beharretara egokitua izango da, bertan giro goxoan liburuak irakurtzeko aukera izan dezaten». 

Liburu txokoko altzari berriak muntatzeko laguntza eskatu dute. Auzolana deitu dute datorren astearterako, uztailak 23 (10:00-13:00 goizean, 16:00-19:00 arratsaldean). Irailaren 13an aurkeztuko dituzte herrian egitasmoa eta talde eragilea.