Chillidaren Burdinazko Eguzkia izenpean, 6 eta 12 urte arteko haurrei zuzendutako arte lantegiak egingo dira Arantzazun urriaren 20an eta 27an, 10:30etik 13:30era, Eduardo Chillida eskulturagilearen lana ezagutzeko, bere jaiotzaren mendeurrena dela-eta.

Maushaus estudioak emango du tailerra, eta Gandiaga Topagunean izango da, ingurua ezagutzeko aukera izango duten arren haurrek. Irudiekin ondutako proiekzio batez gozatzeko aukera izango dute lehendabizi, eta Basilikako ateak ezagutuko dituzte ondoren, behatu eta frottage teknika artistikoa praktikatzeko. Marrazkia eta paperezko collage-ak ere landuko dituzte Gandiaga gunean, eta senideek haurrek eginiko lanak ikustera joateko gonbidapena jasoko dute.

Izena eman nahi izanez gero, adiskideak@arantzazu.org helbidera idatz daiteke mezu bat edo 688 61 38 40 telefono zenbakira deitu. 20 lagunekoa da parte-hartzaileen muga, eta 5 euroko prezioa du.