Desinformazioa eta gorroto diskurtsoak ingurune digitalean izenpean, txosten bat ondu du Save the Children gobernuz kanpoko erakundeak, eta ohartarazi du “horrelako edukiekiko esposizioak zuzen-zuzenean urratzen” dituela haur eta nerabeek “egiazko informazio segurua jasotzeko duten eskubidea”.

Ikerlanaren arabera, Araba, Bizkai eta Gipuzkoan nerabeen ia erdiek –%45ek, hain zuzen– zailtasunak dituzte albiste faltsuak identifikatzeko, eta faltsua izan daitekeen susmoa eduki arren bost nerabetatik batek ez du kontrastatzen; %50,3k, berriz, familia edo lagunengana jotzen dute egia den aztertzeko. Hala ere, erakundeak kezkatzat du familiarteko edo lagun horiek ere informazioa jasotzeko iturri berak erabiltzeaz, eta, horrenbestez, “informazio faltsua betikotzeko arriskua areagotzea”.  

Informatzeko era

Informatzeko moduari dagokionez, nerabeen %54ek telebista darabilte informazioa eskuratzeko bitartekotzat, eta ia maila berean sare sozialak (%46,5). Alabaina, Save the Childrenek ohartarazi du “Internetek informaziorako sarbidea demokratizatu badu ere eduki kaltegarri eta okerren ugaritzea erraztu” egin duela: “Estereotipo eta bizi-eredu irrealak betikotzeaz gain, gorroto-diskurtsoak sustatzen ditu. Esposizio horrek, aintzat hartuta mundu digitaleko harremanek deshumanizazioa dutela ezaugarri nahiz ingurune fisikoan izango ez genituzkeen jokabideak agerrarazten dituela, bereziki zaurgarri bihurtzen ditu neska-mutilak halako edukiekiko”.

Bizimodu-eredu irrealak

Erakundeak, era berean, ohartarazi du ingurune digitalak zuzenean eragiten duela haur eta nerabeen osasun mentalean: “Etengabe sare sozialen bidez bizi-estilo jakin batzuen irudikapen idealen mende egotea, edertasun-estandar jakin batzuen mende eta, bereziki nesken kasuan, emakumeen gorputzaren sexualizazioaren mende”.

Sare sozialetan jarraitzen dituzten profilei dagokienez, azpimarratu du haur eta nerabe horiek, batik bat, neskek, “kideko sentitzen dituzten pertsonei edo aholkuak ematen dizkietenei” jarraitzen dietela; mutilek, berriz, joera gehiago ei dute bideo-jokoen munduarekin edo kirolekin lotutako pertsonekin jarduteko. “Influencer-ek beren burua erakusten dutenean, hori publikoki baliozkotzeak horrelako jokabideak errepikatzera eraman ditzake neska-mutilak, eta, horren ondorioz, alderdi pertsonalagoak edo argazki intimo eta sexualizatuak parteka ditzakete azkenerako”.