Urteko lehen hilabeteotako hotza arintzeko, pantailetara jotzen dugu askotan umeentzako entretenimendu bila. Badaude, ordea, arratsaldeak berotan eta kalitatezko beste entretenimendu mota batekin igarotzeko aukerak; ipuin kontalariak eta txotxongiloak dira horietako batzuk. Hurrengo egunetan, hain zuzen, eskaintza zabala dago Euskal Herriko txoko ezberdinetan.

Hasteko, bihar, urtarrilak 17, 18:00etan Tolosako liburutegian izango da “Gurasoak ere ipuin kontalari” haurrentzako ipuin kontaketa saioa, Miriam Mendozaren gidaritzapean. Leku berean izango da larunbatean 18:30etan “Kazu eta gizon hegalariak” ikuskizuna. Txotxongiloek, musikak eta zuzeneko marrazkiek bat egiten dute ikuskizunean.

Urtarrilaren 21ean, berriz, Basurtuko liburutegian 18:00etan antolatu dute Perli eta Koxkoloren ipuin kontaketa saioa, eta urtarrilaren 23an 18:00etan, Arrasateko Kulturaten izango da Odei Arregi, “Ipuin lotsatiak” saioarekin.