Gazten artean indarkeria matxista prebenitzeko lehiaketa da Beldur Barik. Topaketa, Emakundek eta Arabako, Gipuzkoako eta Bizkaiko Foru Aldundiek sustatu dute, EUDELekin batera. Txorierriko Mankomunitateak eta Derioko Udalak ere parte hartu dute antolakuntzan. Edizio honetan, 300 lan baino gehiago bidali dituzte eta saritutako bideoak Bilbo, Irun, Portugalete, Oñati. Derio eta Donostiatik iritsi dira.

Ostiralean izan zen sari banaketa Derioko Kultur Birikan eta lurralde osoko ehun gazte inguruk hartu zuten parte. Aurretik ordea, hainbat tailer izan ziren; Patata Tropikala antzerki laborategiko Eta hala ez bazan? antzerki tailerra, Ez da txantxa maskulinitate berrien tailerra, Jon Lopez Corcheroren eskutik, eta #BBJ ahalduntze tailerra, Kabia eta Parean elkarteen eskutik. Sünek ere topaketa girotu zuen Milaka Lore eta Kantauri abestuz.

Sarituak

Maskulinitate toxikoa, desberdintasun mediatikoa eta genero-rolak salatu dituzten lanen sari banaketa, Ekhiñe Atorrasagasti kazetariak eta Estibaliz Pescador idazle deriotarrak gidatu zuten.

Ikus-entzunezkorik onenaren saria Donostiako AEG ikastetxeko Patroigintza eta Modako 2. mailako ikasleek irabazi dute, Kahtarsi izeneko bideoagatik. “Desberdintasun mediatikoa modu ezin hobean salatzen du bideoak. Gizonak beren ibilbideagatik baloratzen diren bitartean, emakumeen balorazioa askotan beren bizitza pertsonalera eta itxurara murrizten da”, adierazi zuen epaimahaiak.

Hiru sari banatu ziren 12-16 urtekoen kategorian. Krisalida, Kalewinak eta Youtuber Toxikoak izan ziren sarituak. Krisalida bideoak banakako saria eraman zuen. “Transexualitatearen gaia ausardiaz jorratzen du bideoan”, esan zuen epaimahaiak. Kalewinak, aipamen bereziaren saria jaso zuen IES Zunzunegui BHItik: “Beren bideoan oso modu original eta dibertigarrian islatu dute estereotiporik eta rolik gabeko mundu berri bat”. Youtuber Toxikoak berriz, Urretxindorra Ikastolako ikasleen lana da eta taldean egindako lanaren saria eraman zuen. ” Bideoan, maskulinotasun toxikoa sustatzen duten youtuberrek gazteengan izan dezaketen eragina islatzen da”, zioen epaimahiak.

17 eta 20 urte bitartekoen kategorian, Zu… Aldatzeko prest zaude? bideoak taldekako saria eraman zuen, Oñati Institutuko Lanbide Heziketako ikasleek sortutakoak: “Espazio maskulinizatuen okupazioaren eta maskulinotasun berrien aldeko apustua egiten dute”.