Hezkuntza-komunitateetako eta tokiko erakundeetako kideei zuzenduta, Eskolan sukaldea daukagu eta orain zer? izeneko jardunaldia antolatu du Gure Platera Gure Aukera plataformak. Adierazi dutenez, 2019an Eusko Legebiltzarrak hartutako “konpromiso politikoa” oinarri hartuta eskola-jantokien kudeaketa deszentralizatura hurbilketa egiteko baliatuko dute eguna.

Jardunaldian, Aitor Bilbao, gaian aditua de abokatua izango da. Bestetik, bi esperientzia ezagutaraziko dituzte; Eba Colominok Urduñako eskolako esperientzia, eta, Nerea Martiarena eta Marta Barbak, berriz, Araitz-Beteluko eskolarena. Hori guztia, Bergara Udaleko pleno aretoan izango da, urtarrilaren 31n, 10:00etatik 13:30era.

Jantoki-eredua aldatzea helburu

“Hezkuntza Sailak sukalderik gabeko ikastetxe publikoak eraikitzeko duen politika lehengoratzea lortu dugun arren, catering makro-enpresek kudeatutako jantoki-eredua blindatuta dauka Hezkuntza sailak. Erantzunik gabe jarraitzen dute hainbat aldarrikapenek eta 2016an abiatutako proiektu pilotuen ez daukate oraindik aterki juridikorik”, diote Gure Platera Gure Aukera-tik.