Lehen Hezkuntzako laugarren mailako ikasleen laguntzarekin, ikastetxeetan sortzen den hondakin kopurua murriztea helburu duen ekimena da Hondakinik gabeko jolasaldiak izenekoa. Aurten, hirugarren edizioa antolatu dute, eta, besteak beste, haurrei ingurumena zaintzearen “kontzientziazioa” garatzen eta hondakinak “behar bezala kudeatzearen garrantziaz” jabetzen erakusteko balio du.

Alba Delgado Barakaldoko Garapen Iraunkorreko eta Ingurune Naturaleko zinegotziak adierazi duenez, “ikastetxeetan gai hori lantzeko saio espezifikoak egin dira eta parte hartu duten ikasleei bazkaria edo askaria eramateko poltsatxo berrerabilgarria eman zaie”. Bestetik, ikasleen familiei kanpainaren helburuak azaltzen dituen gutun bat ere bidali zaie. Delgadok gaineratu duenez, aurreko edizioetan gero eta haur gehiagok janaria poltsa berrerabilgarrian eramaten dutela “egiaztatu da”.

Honako ikastetxe hauek egin dute bat ekimenarekin: Arrontegi, Zuazo, Arteagabeitia, El Pilar, Alkartu, Munoa, La Inmaculada, San Vicente de Paul, Larrea, Salesianos Barakaldo, Ibaibe, Salesianos Cruces, Bagatza eta Gurutzeta.