Badira zenbait aste, ETB3, ETB1 On dela. Aldaketa hau, katearen digitalizazio prozesuko pausoa dela diote ETBko zuzendaritzatik. “Guretzat birmoldaketa bat da. Gazteengandik hurbilago egoteko ari gara. Gure kasuan, euskara ahul dagoela jakinda, bi kateak hedapen digitalera bideratu ditugu, uste dugulako etorkizuna hortik datorrela”, azaldu zion ETBko zuzendaria den Isabel Octaviok Berria egunkariari.

Erabaki horrekin ordea, ez dira konforme agertu Aldatu Gidoia eta Pantailak Euskaraz taldeak. Salatu dutenez, aurrerantzean Euskal Herriko etxe askotan, “euskaraz marrazki bizidunak ikusteko aukerarik ez da egongo”. Bestalde, horrek euskararen normalizazioan dakarren “kalte atzeraezina” ere salatu du Pantailak Euskaraz taldeak. Horregatik, sinadura bilketa abiatu zuen taldeak, eta, momentuz, 23.000 sinadura baino gehiago bildu dituzte.

EITBko langileen batzordeek, bestalde, agiri batean haurrek edukiak ikusteko “leiho gutxiago” izango dituztela adierazi dute.