Jakina da gaur egun pantailek presentzia handia dutela gure bizitzetan. Horren inguruan eztabaida ugari sortu dira azken urteotan, eta badira haur eta gaztetxoen pantaila aurreko orduak murrizteko ekimenak sustatu dituzten taldeak, baita gailu horietarako sarbidea ahalik eta gehien atzeratzen saiatzen direnak ere. Eztabaidak alde batera utzita, ordea, ukaezina da gaur egun denok ematen dugula makina bat ordu pantailen aurrean: telebistari, ordenagailuari, tabletari edo telefonoari begira. Etxe askotan, gainera, pantailen aurrean familiartean partekatzeko une goxoak sortzen dira: pelikula bat arratsaldean, telesail bat edo bideojoko partekatuen tartetxo bat…

Pantailen bidez kontsumitzen dugun edukia askotarikoa da: sare sozialak, streaming plataformak, zinema, telebista edo bideo-jokoak. Edukiak ikusten, sortzen eta partekatzen denbora asko ematen dugu, baina kontsumo hori gehienetan gaztelaniaz egiten da. Izan ere, gaur egun oraindik ere euskarak presentzia urria du plataforma digitaletan.

Errealitate hori eraldatzeko asmoz sortu zen 2021ean Pantailak Euskaraz ekimena. Hainbat taldek eta eragilek bat egin zuten helburu berarekin: mota guztietako pantailetan euskararen presentzia handitzea. Besteak beste, Netflix Euskaraz, Disney+ Euskaraz, Tinko Euskara elkartea, Bikoiztaile Euskaldunon Elkartea, Zinemak Euskaraz ekimena eta Game Erauntsia elkarteko hainbat kide elkartu ziren proiektu hau martxan jartzeko.

Haien lanari esker, gaur egun erabiltzaileek errazago aurki ditzakete euskarazko edukiak. Gainera, pixkanaka gero eta gehiago dira euskaraz sortzen diren ikus-entzunezkoak. Pantailak Euskaraz ekimenak, beraz, euskaraz zer eduki dagoen eta non ikus edo aurki daitekeen jasotzen du bere webgunean. 

Ekimena bi norabidetan ari da lanean. Alde batetik, erakundeei eta bestelako eragileei euskarazko edukiak sortu eta zabal ditzatela eskatzen die. Horretarako hainbat proposamen egin dituzte: euskarazko ikus-entzunezko sektorea diruz laguntzea, Euskal Irrati Telebista indartzea eta euskararen normalizaziorako tresna eraginkor bihurtzea, euskarazko streaming plataforma bat sortzea, plataforma nagusietan euskararen presentzia bermatzea edo bideo-jokoetan euskararen erabilera sustatzea…

Eta bestetik, dagoeneko existitzen den euskarazko eskaintza ezagutarazten saiatzen da. Horretarako, webgunean “Zer non ikusi” atala sortu dute. Bertan euskarazko eskaintza kontsulta daiteke, eta zein plataformatan ikus daitekeen: filmak, telesailak, dokumentalak, haurrentzako edukiak, euskaraz azpidatzitako lanak edo ikastetxeetarako materiala, besteak beste. 

Gainera, hezkuntzarako baliabide zerrenda ere argitaratu dute. Dokumentu horretan hainbat tresna bildu dituzte: ikasmaterialen dokumentazioa, hiztegiak eta itzultzaileak, testu-zuzentzaileak, multimedia baliabideak eta arlo espezifikoetarako materialak, hala nola zientzia, literatura edo zinema. Horrez gain, sarean eskuragarri dauden euskarazko ikus-entzunezko baliabideak ere jasotzen dituzte beste dokumentu batean. Bertan aurki daitezke, adibidez, podcastak, bideo-jokoak, Primeran plataforma…

Familia askorentzat, seme-alabekin batera eduki digitalak kontsumitzea hezkuntzaren parte bihurtu da. Film bat elkarrekin aukeratzea, telesail bat komentatzea edo erabiltzen dituzten bideojokoekiko interesa izatea ere aukera bat izan daiteke ikasgelatik kanpo euskara indartzeko. Pantailak, askotan distrakzio gisa bakarrik ikusten ditugunak, hizkuntza egunerokotasunean erabiltzeko espazio bihur daitezke.

Ekimen honi esker, beraz, euskara espazio digitalean zabaltzen ari da eta, orain, eskura ditugun baliabide guzti horiekin, kontsumitzaile bezala, gure esku dago zer eta nola ikusten dugun erabakitzea. Familien esku dago etxean zer eduki sartzen den erabakitzea. 

Era.eus taritik ekarri dugu honako artikulua.