Apirilaren 2a izan zen Autismoaz Kontzientziatzeko Munduko Eguna; eta egun horren harira, Osakidetzak emandako datuen arabera, 5.000 paziente baino gehiagok dute Euskal Autonomia Erkidegoan, Autismoaren Espektroko Nahasmendua (AEN) dutenak. Gainera, 500 kasu berri baino gehiago detektatzen dira urtero.

Osasun Sailak, diagnostiko hori duten pertsonen arreta errazteko, lehentasunezko osasun-txartel indibidual bat jarri du martxan. Tresna berri honen helburua da, miaketak eta tratamenduak arintzea eta beharrezkoak ez diren itxaronaldiak saihestea.

Txartela, lehen mailako arretako medikuaren bidez osasun-zentroan eska daiteke, eta, ondoren, etxera bidaltzen da. Halaber, jakinarazi dutenez, Autismoaren Espektroko Nahasmendua diagnostikatuta duten pertsonek ez ezik, dibertsitate funtzionala edo garapenekoa dutenek ere jaso ahal dute.

Familien esperientzia “hobetzeko”

Neurria, Euskadiko Osasun Itunaren esparruan kokatzen dela azaldu dute, sistema sanitario “irisgarriago, inklusiboago eta hurbilago” baten aldeko estrategiaren barruan. Testuinguru horretan, Eusko Jaurlaritzako Osasun Sailak adierazi du helburua dela, “pazienteen eta haien familien esperientzia hobetzea, arreta azkartuz eta ingurune sanitarioan sortzen diren zailtasunak gutxituz”.

Gaineratu dutenez, txartel honek, “arreta-zirkuituak egokitzeko aukera ematen du, pazienteak azkar identifikatuz eta, ahal den neurrian, jende pilaketak saihestuz”. Halaber, nabarmendu dute neurriak tratu “pertsonalizatuagoa” ahalbidetzen duela, paziente bakoitzaren “zentzumen- eta komunikazio-beharrak kontuan hartuta”, eta, horrek, “arreta gizatiarragoa eta egokituagoa” eskaintzea errazten duela.