Eskola-jazarpenaren aurkako kontzientzia pizteko asmoz, Gookapi eta AEPAEk Superheroiak bullying-aren aurka hedapen kanpaina aurkeztu dute, maiatzaren 2an izango den Eskola-Jazarpenaren Aurkako Nazioarteko Egunarekin bat egiteko. Ekimenaren helburu nagusia haurren artean errespetua eta elkarbizitza sustatzea da.

Kanpainaren baitan, Kontaidazu, iratxo: superheroiak bullying.aren aurka izeneko zazpi minutuko ikus-entzunezko atala aurkeztu da, 5 eta 11 urte bitarteko haurrei zuzendua. Proiektuak Sua Enparantza dantzari eta aktorearen parte-hartzea du, eta formatu erakargarri eta ulerterrazean lantzen du eskola-jazarpenaren gaia.

Telesaila Baleukok ekoitzi du, Gookapiren laguntzarekin, eta Eusko Jaurlaritzako Kultura eta Hizkuntza Politika Sailaren babesari esker gauzatu da. Proiektuak kalitatezko eduki pedagogikoa eskaintzen du, haurrei zuzenean hitz egiteko modukoa.

Kontaidazu Iratxo programaren helburua, tresna erabilgarria izatea da familientzat, ikastetxeentzat eta elkarteentzat. Haurrekin gai zailak lantzeko lehen urratsa erraztea bilatzen du, izotza apurtu eta elkarrizketa sustatzeko baliabide gisa. Halaber, ekimenak balio garrantzitsuak indartzen ditu, hala nola enpatia, ausardia, tolerantzia eta erresilientzia, eguneroko bizitzan aplikagarriak direnak.

Antolatzaileek azpimarratu dute halako baliabideek funtsezko zeregina dutela eskola-jazarpena ikusarazteko eta prebenitzeko, batez ere adin txikikoen artean. Horregatik, hezkuntza-komunitate osoari dei egin diote ekimena ezagutu eta erabiltzeko.

Informazio gehiago eskuratzeko, interesa dutenek komunikazioa@gookapi.eus helbidera idatzi edo 944 77 10 99 telefonora deitu dezakete.