Esaerak dio dantzatzen den herria ez dela inoiz hilko, eta horretan ari dira egunotan Donostiako San Telmo Museoan. Ikusgai dute Argiaren itzala izeneko erakusketa, eta familian egiteko festa giroko dantzak ikasteko tailerrak egingo dituzte maiatzaren 23an eta 30ean. Bi kasuetan, 17:00etan.

Monika Bañalesek eta Itziar Otamendik egingo dituzte dinamizatzaile lanak. Familiek euskal dantzen unibertsoan sartzeko aukera paregabea izango dute. Saioen izena da Festak elkarrekin dantzan ospatuaz eta Euskal Herriko festekin lotzen diren hiru dantza jolas moduan ikasiko dituzte familiek.

Erakusketa gomendagarria

Gaur egungo euskal dantza, bere egoera eta azken 60 urteetako bilakaera ezin daitezke ulertu Argia talderik gabe. Marian Arregiren eta Juan Antonio Urbeltzen gidaritzapean 60ko hamarkadatik gaurdaino Argiak egindako lanak dantzaren geografia zabaldu du, koreografia, dantza-era, pausu, doinu, erritmo edo jantzi berriak dantza taldeen errepertorioari eta euskaldunon imajinarioari gehituz.

Argia taldeak, herriz herri egindako landa-lanaren bidez, desagertzear zeuden dantzak, musikak eta jantziak berreskuratu zituen, eta ikerketa lan hori funtsezkoa da egungo euskal dantza ulertzeko. Lan horren emaitza da Argiaren itzala proiektua.

Erakusketa dago ikusgai San Telmo museoan, gomendagarria hori ere familian ikusteko. Egindako ikerketaren bueltako erakusketa da. Ikusgai jarri diren piezen artean, Argiaren funtsetako dantzarako tresnak, arropak eta garaiko irudien artxibo handia daude.

Tailerretarako ezinbestekoa da aurrez izena ematea. Informazio gehiago hemen