Emakundek bat egin du nutil gazteen artean “berdintasunean oinarritutako maskulinitateak” sustatzeko helburua duen Broders komunitate digital berriarekin. Fundación Iniciativa Social (FIS) eta Lainterseccion elkarteek bultzatutako proiektua da Broders, eta EAEn garatzeko ardura Gizonduz zerbitzuak hartu du bere gain.

Ekimenaren aurkezpenean, Miren Elgarresta Emakundeko zuzendariak azaldu duenez, gaur egungo testuinguru digitalean “diskurtso misoginoak eta berdintasunaren aurkako diskurtsoak nagusitzen ari dira”, eta ohartarazi du “maskulinotasun toxikoa indartzen duen manosfera hedatzen ari den mundu honetan, gertatzen ari denari arreta jartzeko betebeharra” dagoela.

Mutil gazteendako espazioa

Horren aurrean, Broders plataformak mutil gazteei “espazio seguru eta anonimo bat” eskaini nahi diela nabarmendu du Elgarrestak: “askatasunez adierazteko eta zaurgarri agertzeko aukera izan dezaten, eta hori eragozten dien maskulinotasunaren presiorik gabe”.

Ekimenaren bidez, gazteek foro digital batean parte hartu ahal izango dute, harremanei, sexualitateari, osasunari edo eguneroko kezkei buruzko galderak eta iritziak modu anonimoan plazaratzeko. Plataformak, gainera, berdintasuna eta harreman osasuntsuak lantzeko materialak eskainiko ditu, baita txat anonimo bat ere, prestatutako boluntarioekin zuzenean hitz egiteko aukera emanez.

EAEn proiektua egokitzeko lanean, Gizonduzek webgunea euskaratu du, eta gazteei laguntza emango dien boluntario euskaldunen sare bat sortu du.

Emakundeko zuzendariak amaitzeko gogorarazi du berdintasun-politikek “bi norabidetan” lan egin behar dutela: “Emakumeen eta nesken ahalduntzea bultzatuz, eta gizonen eta mutilen inplikazioa sustatuz berdintasunaren alde”.