Azken asteotan (urteotan ez esateagatik), haur eta nerabeen artean buru-osasuneko arazoak eta suizidio-arriskuaren tasak nabarmen handitu direla entzuten ari gara. Horrek zuzenean eragiten digu gurasooi, eta, bereziki, beldurra pizten du.

Eta beldur hori arrunta bezain normala da: autolesioen eta suizidioaren mamua presente sentitzea.

Horren aurrean, zer egin? Bada, hitz egin. Gaia mahaigaineratu. Bikotearekin, baldin badago; lagunekin; gurasotasun-kideekin; ikastetxearekin… Izan ere, osasun mentalean negatiboki gehien eragiten duten elementuetako batzuk isiltasuna eta isolamendua baitira.

Bakardadean eta isiltasunean, beldurrak eta minak areagotu egiten dira. Aldiz, ahoskatzen direnean, negatibotzat ditugun sentimenduak arindu egiten dira. Kanporatze hutsak berak laguntzen du. Horregatik, oso garrantzitsua da adierazpen-bideak eskaintzea: dantza, sormenezko idazketa, egunerokoak, musika, arte plastikoak…

Gainera, berbalizatze horretan beste norbaitek entzuten bazaitu, arreta eskaintzen badizu eta zure ondoan badago, erortzeko sarea edo puzgarria bertan daudela sentitzen duzu.

Ondorioz, etxeko, parkeko edo (haientzat gogokoenak diren) autoko elkarrizketetan aipa ditzagun buru-osasuna, autozainketa, autoestima eta baita suizidioa ere. Entzun dezatela: gai horiek guztiak beldurra pizten digutela; beraiek sufritzea ez dugula atsegin; eta behar dutenean guri edo erreferentziazko beste helduren bati laguntza eskatzea nahiko genukeela. Eta, momenturen batean min eman badiegu, esan diezagutela, elkarrekin bideratzen saiatuko garela.

Hortxe, guk gure beldurrak arinduko ditugu. Baina… beraienak?

Esandakoa: haur eta nerabeekin hitz egin behar dugu. Guk esaten dizkiegunak garrantzitsuak dira, bai, baina bereziki beraiek transmititzen dizkigutenak. Alegia, edozein gairi buruz hitz egiteko atea irekita dutela sentitzen badute, beraien ezinegonak ere partekatuko dituzte, eta beraien jakin-minetatik edo zailtasunetatik abiatuta eraikitzen has gaitezke. Ahal dela, txiki-txikitatik.

Hori bai, zure ingurukoak dagoeneko nerabeak badira, oraindik ere baduzu aukera. Pazientzia handiagoa beharko duzula, hori bai, ziur egon. Eta zure beldurrik handienak partekatzeko, bilatu zure sarea.

Suizidioaren prebentzioan, suizidioaz hitz egin behar baita.