Arrasate eta Elorregi artean –Ekilore dendaren ondoan– eta Deba ibaiaren meandroan kokatuta dago Etxezarreta parkea. Rafael Ariza Etxezarretak XIX. mende amaieran eraikitako lorategi botanikoa berreskuratzeko lanak egin ditu bertan Arrasateko Udalak. Gunea, orain arte, degradatuta egon den arren, izaera berezia eta zuhaitz erraldoi zaharren bilduma baliotsua gordetzen ditu –sekuoiak, zedroak, haginak eta abar–.

Besteak beste, lorategi barneko bide-sare natural berria sortu dute, 416 metro luze dena. Garai bateko bide-sarea galduta bazegoen ere, puntu batzuetan berreskuratu eta berriak sortu dira. Gainera, berez sortutako begetazioa garbitu eta soropilen eta zelaien antolamendu berria ezarri dute. Halaber, zuhaitz eta zuhaixka berriak landatu dituzte: koniferoak, astigar japoniarrak, magnoliak, gereziondoak, palmondoak… Guztira 80 bat landaketa egin dituzte. Amaitzeko, atsedenerako, egurrezko eserleku berriak jarri dituzte, herritarrek naturaz “goza dezaten”, eta laster jarriko dituzte seinale berriak eta informazio-panelak.