Azken hamarkadetako garapen ereduak natur eremuetatik urrundu eta porlanezko hiri  handietara bizitzera eraman gaitu. Honek, naturak eguneroko bizimoduan aurrera egiteko  eskaintzen dizkigun baliabideei muzin egitea ekarri du.  

Naturatik urruntzeak,  kultura oso baten galera suposatzen du: jakituria, ohitura, erritu, legenda eta kontakizun herrikoiak; zuhaitz, landare eta animalien ingurukoak; landa eremuaren, urtaroen eta, oro har, lurraren ingurukoak; osasuntsu bizitzen laguntzen zigutenak eta, batez ere, gure bizitzari benetako zentzua ematen diotenak.

Aldi berean argi dugu, natura ordezkorik ez duen osasun, ongizate, ikasketa eta sormen iturri agorrezina dela eta hau horrela, beharrezko ikusten dugu natur guneekiko atxikimendua areagotzeko dinamikak sortzea.

Zentzu horretan, Leintz Eskola Kirola, Besaide Mendi Elkartea, Gaztetxeko Guraso eta Haur Asanblada, Txatxilipurdik elkarlanean, Arrasateko udalarenbabesarekin eta aurtengoan aliantzan, Naturan Jolasean jaialdiaren 11. edizioa gauzatu zuten pasa den maiatzaren 31an, igandean. Etxezarretako natur gune berriaren inaugurazio ekitaldiarekin bat eginez.

Etxezarreta parkeko lorategia berreskuratzeko lanak amaituta, goiz osoko egitaraua antolatu zuen Arrasateko Udalak, Txatxilipurdi elkartearekin elkarlanean. Balio handiko parke eta lorategi botanikoa berreskuratu da, herritarrek erabiltzeko, aisialdirako naturgune berri bat sortuz.

Iñaki Telleriak, Txatxilipurdi elkarteko kideak , parkean egin ahal izango diren jarduera posibleen inguruan hausnartu zuen: “Eremu honek hamaika erabilera mota izango ditu. Izan daiteke ikastetxeetatik hona etortzeko hiruhileko amaierako txangoetan, Txatxilipurdin egiten ditugun ekimenetarako erabili ahal izango dugun espazio oso aproposa da, eta nik uste dut aisialdian arrasatearrentzako ere espazio on bat izan daitekeela, babesleku klimatiko bat egun beroenetarako”.

Etxezarretako Parke botanikoa, garrantzi handikoa izan zen, nahiz eta erreka ertzeko landaretza tipikoa izan, zuhaitz exotiko batzuek ere aurkituko ditugu.

Erreka ertz horretan aurkituko ditugu dozena erdi bat sekuoia erraldoi, ehun urte baino zaharragoak, haien artean borrokan argi bila. Haien alboan ere ikusi daitezke Atlasko zedro bat, antzeko adinekoa, gero Lawson-go nekostak, dozena inguru bat, halaber, 3 araukaria daude, tamaina handikoak, oso gaitzak aurkitzeko.

Etxetik hurrean, garai batean mahaia jartzen zen lekuan merienda egiteko, ikusiko dugu hainbat ereinotz 15 metro luze adaburuarekin, baita ere, 2 makal kanadar, 4 metroko diametrodunak, ez oso arruntak gaurko eguenan, eta bi gorosti handi, 50 zentimetroko diametroduna eta 8 metrokoalturakoak, botanika liburuetan teorian agertzen den tamaina baino asko handiagoak. Halaber, ikusiko ditugu magnolio handi batzuk, haginen bat-edo aizkorakadez enborretan, hainbat izeia hurbil, haien artean babesten, eta India jatorriko zuhaitz bat, Jupiter zuhaitza (lagerstroemia speciosa), gaur egun ondo egokituta hemengo klimari.

Lehen aipatutako zuhaitzez gain, badira likidanbarrak, ezkiak, haritzak, lizarrak, errododendroak, itsas pinuak, banbuak, sahatsak, haltzak, intxaurrondoak eta hainbat atxapar lila batzuk etxearen hondarretan, hormak eusten.