Bidaiatzea buruhaustea izan ohi da askotan, eta, haur txikiekin egitea are eta gehiago; aireportuetan eta hegaldian gorabeherak izaten direlako. Hala nola, atzerapenak, ezeztapenak, eskala luzeak edota bagajearekin lotura duten arazoak izaten dira ohikoenak.

Erreklamatuko abokatu den Jon Ortiz Larruzeak, haurrekin bidaiatzean gerta daitezkeen askotariko egoeren jakitun, uda honetan bidaiatu aurretik kontuan hartu beharreko hamar gomendio bildu ditu. Hona hemen gomendio horiek:

1. Kontuz haur-kotxeekin: airelinea guztiek ez dituzte modu berean onartzen

Familia askok uste dute haur-kotxea hegazkinera igo arte erabili ahal izango dutela, baina ez da beti
horrela izaten. Konpainia gehienek doan garraiatzeko aukera ematen badute ere, baldintzak aldatu egiten dira airelinea batetik bestera. Batzuek hegazkinaren ateraino erabiltzen uzten dute eta helmugan bertan itzultzen dute; beste batzuek, berriz, fakturatzera behartzen dute eta ekipaje zintan jaso behar izaten da.

Horregatik, Jon Ortiz Larruzeak gomendatzen du bidaia baino lehen argitzea haur-kotxea hegazkinaren
ateraino eraman ahal izango den eta lurreratu ondoren non jasoko den, bereziki eskalak dituzten
hegaldietan.

“Gainera, komeni da entregatu aurretik argazki batzuk egitea. Kotxea hondatuta agertzen bada edo ez
bada iristen, aireportutik irten aurretik PIR agiria bete behar da ekipajeen erakusmahaian; dokumentu
hori funtsezkoa da gero erreklamazioa egin ahal izateko”” azaldu du.

2. Haurraren esnea, ura eta janaria eraman ditzakezu, nahiz eta likidoen murrizketak egon

Familia askok beldurra izaten dute segurtasun-kontrolean haurraren ura, esnea edo janaria kenduko
dietelako. Hala ere, araudiak salbuespenak aurreikusten ditu haurrentzako elikagaientzat, biberoietarako
urarentzat, potoentzat eta bidaian beharrezkoak diren beste produktu batzuentzat, ohiko likido-mugak
gainditzen badituzte ere.

ERREKLAMATUk gomendatzen du produktu horiek eskuko ekipajeko gainerako objektuetatik bereizita
eramatea eta segurtasuneko langileei aurretik jakinaraztea, alferrikako atzerapenak edo eztabaidak
saihesteko.

“Era berean, ez da komeni haurrarentzat ezinbestekoak diren produktuak fakturatzea; ekipajea galdu edo berandu iritsiz gero arazo handiak sor ditzake”, adierazi du abokatuak.

3. Ontziratzea izan ohi da unerik estresagarrienetako bat

Haur-kotxeak, motxilak, umeentzako poltsak, azken orduko ate-aldaketak, kontrol osagarriak edo ilara
amaigabeak direla eta, ontziratzea bidaiako unerik zailenetako bat bihur daiteke familia askorentzat,
batez ere udan eta aireportu jendetsuetan.

Horregatik, haur edo haurtxoekin bidaiatzean komeni da aireportura ohikoa baino lehenago iristea,
dokumentazioa eta ontziratze-txartelak eskura edukitzea eta kontrol bereziak sor ditzaketen objektuak
kontuan hartzea.

4. Familia batzuek beranduegi ohartzen dira hegazkinean bananduta joango direla

Gero eta airelinea gehiagok kobratzen dute eserlekua aukeratzeagatik, eta familia askok check-ina egiten
dutenean ikusten dute adingabeak gurasoengandik edo laguntzaileengandik aparte esleitu dituztela.

Europako araudiak ez badu ere espresuki esaten eserleku guztiak elkarren ondoan egon behar direnik,
Europako erakundeek behin eta berriz azpimarratu dute konpainiek saihestu egin behar dutela adingabeak haiekin bidaiatzen duten helduengandik bereiztea.

Horregatik, ERREKLAMATUko abokatuak gomendatzen du eserlekuak check-ina egin bezain laster
egiaztatzea eta arazoa konpontzeko azken unera arte ez itxarotea.

“Konpainiak haur txikiak ez banantzeko aparteko ordainketa egitera behartzen badu, komeni da pantaila-
argazkiak edo mezu elektronikoak gordetzea”, azaldu du.

5. Ez pentsatu hegazkinean beti haurrentzako janaria edo esne beroa izango denik

Familia askok hegaldian bertan konturatzen dira airelineak ez duela haurrentzako menurik, esne berorik,
potoentzako aukerarik edo haur txikientzat beharrezkoak izan daitezkeen beste zerbitzu batzuk
eskaintzen. Gainera, low cost konpainietan eskaintza are mugatuagoa izaten da normalean.

“Bidaiatu aurretik komeni da airelinea bakoitzak zer eskaintzen duen egiaztatzea. Eta beti eramatea
janari, esne, ur edo haurrentzako produktuen kopuru nahikoa, batez ere hegaldia luzea bada, eskalak
badaude edo atzerapenak izateko arriskua badago”, dio Ortizek.

6. Pixoihalak aldatzea ez da beti erraza: hegazkin eta aireportu guztiak ez daude prestatuta

Hegazkin guztiek ez dute haurtxoentzako aldagailurik. Hegaldi laburretan edo tamaina txikiko
hegazkinetan, adibidez, baliteke umea aldatzeko espazio egokirik ez egotea.

Horregatik, ERREKLAMATUk gomendatzen du bidaia baino lehen airelineak eta aireportuak eskaintzen
dituzten zerbitzuak egiaztatzea, batez ere hegaldia luzea bada edo eskalak baditu.

    “Eta komeni da beti eskura eramatea pixoihalak, toallatxoak, ordezko arropa eta oinarrizko produktuak
    hainbat ordutarako; atzerapen edo ustekabeko itxaronaldi batek egoera asko zaildu baitezake haur
    txikiekin bidaiatzen denean”, azaldu du.

    7. Aireportu guztiak ez daude txikientzat prestatuta

    Aireportuen arteko aldea handia izan daiteke haur txikiekin bidaiatzen denean. Batzuek familia-guneak,
    haurrentzako espazioak edo edoskitze-gelak dituzte; beste batzuek, aldiz, apenas eskaintzen dute atseden hartzeko edo haur bat zaintzeko tokirik.

    Horregatik, abokatuak gomendatzen du eskalako edo helmugako aireportuetan dauden zerbitzuak aldez
    aurretik aztertzea, batez ere nazioarteko konexioetan edo bidaia luzeetan.

    Era berean, hegaldien artean denbora nahikoa uztea eta udako hilabeteetan oso jendetsuak diren
    aireportuetan eskala luzeegiak saihestea aholkatzen du.

    8. Gaueko hegaldiak eta eskala luzeak bereziki gogorrak izan daitezke

    Ordu askotako eskala batek, goizaldeko atzerapen batek edo gaueko ezeztapen batek egoera oso zaila sor dezake haur edo haurtxoekin bidaiatzen denean. Aireportu jendetsuak, nekatutako umeak, atseden
    hartzeko gune faltak edo terminaletan ordu luzez zain dauden familiak nahiko ohiko irudiak dira udan.

    “Arazoa ez da atzerapena bakarrik. Haur txikiekin, sei edo zazpi ordu aireportu batean zain egotea oso
    egoera zaila bihur daiteke familia askorentzat”, azaldu du Jon Ortizek. Horregatik, ahal den neurrian,
    adingabeekin bidaiatzean oso estuak diren konexioak edo gaueko eskalak saihestea gomendatzen du.

    Halaber, eskuko ekipajean ordezko arropa, janaria, kanpoko bateria, botikak eta oinarrizko produktuak
    eramatea aholkatzen du, bidaia espero baino gehiago luzatuko balitz ere.

    ERREKLAMATUk gogorarazi du, gainera, gorabehera baten ondorioz etxetik kanpo gaua igaro behar bada, airelineak laguntza, ostatua eta garraioa eskaini behar dituela. “Familia askok edozein irtenbide onartzen dute nekatuta daudelako eta aireportutik ahalik eta azkarren irten nahi dutelako”, dio Ortizek.

    9. Haur baten ekipajea galtzea arazo handia izan daiteke

    Haur txikiekin bidaiatzen denean, maleta galtzeak ez du esan nahi arropa gabe geratzea bakarrik.
    Pixoihalak, haurrentzako esnea, botikak edo oinarrizko produktuak beste aireportu batean gera daitezke
    orduz edo baita egunez ere.

    Horregatik, ERREKLAMATUk gomendatzen du ezinbestekoak diren gauzak ekipaje fakturatuaren eta
    eskuko ekipajearen artean banatzea, eta premiaz behar daitekeen guztia beti gainean eramatea.

    Jon Ortizek gogorarazi du ekipaje-galeraren ondorioz egin behar diren premiazko erosketak
    —haurrentzako arropa, pixoihalak edo higiene-produktuak, esaterako— gero airelineari erreklamatu
    ahal zaizkiola; horretarako, ezinbestekoa da tiketak eta fakturak gordetzea.

    10. Haurrekin bidaiatzeak areagotu egiten du edozein gorabeheraren eragina

    Ezeztapen bat, atzerapen handi bat edo overbooking egoera bat ez dira inoiz atseginak, baina are
    zailagoak izan daitezke haur edo haurtxoekin bidaiatzen denean. Horregatik, abokatuak gogorarazi du
    airelineek laguntza emateko betebeharra dutela atzerapen handiak, ezeztapenak edo overbooking
    egoerak gertatzen direnean.

    “Janaria, edaria, ostatua, garraioa edo bidaiarekin jarraitzeko arrazoizko alternatibak eskaini behar
    dizkigute. Eta are arreta handiagoz jokatu beharko lukete adingabeak tartean daudenean”, azaldu du.

    ERREKLAMATUk gomendatzen du beti gordetzea ontziratze-txartelak, tiketak, fakturak eta airelinearekin
    izandako komunikazio guztiak. Halaber, familiei gogorarazten die informazioa eta doako aholkularitza
    eskaintzen dituela, beren eskubideak ezagutu eta kasu bakoitzean zer konpentsazio eskatu dezaketen
    jakin dezaten.