Naroa Martinez idazleak eta Unai Ruiz ilustratzaileak irabazi dute 2026ko Etxepare Saria, Afonia izeneko album ilustratuari esker. Lan irabazlea datorren udazkenean argitaratuko du Pamiela argitaletxeak, euskaraz, eta egileek 5.000 euroko saria jasoko dute. Aurtengo deialdian guztira 26 lan aurkeztu dira.

Patxi Zubizarreta idazleak, Idoia Sobrino liburuzainak eta Aitziber Akerreta ilustratzaileak osatutako epaimahaiaren arabera, Afonia doluaren eta memoriaren inguruko album hunkigarria da. Azpimarratu dutenez, istorioak galera baten mina jorratzen du, baina, aldi berean, oroimenaren bidez maite dugun pertsona bizirik mantentzeko aldarria ere bada. Horretan, aitonaren ondarea eta ezkila-jotzearen tradizioa belaunaldiz belaunaldi transmititzen dituen ilobaren irudia funtsezkoa da.

Epaimahaiak nabarmendu du testuak erabiltzen duen hizkuntza, onomatopeiek eta errepikapenek erritmo berezia ematen diotela kontakizunari, ezkilen sokari jarraituz egingo balitz bezala. Era berean, irudiek kolore eta baliabide grafiko soilak erabiliz transmititzen dute doluak uzten duen hutsunea, isiltasuna eta etsipena. Testua eta ilustrazioak elkarren osagarri dira, doluak eskatzen duen denbora eta pausaren bidez joan den pertsonak utzitako aztarnak berraurkitzeko bidea irudikatuz.

Bikoteka tailerretik sarira

Afonia proiektuaren sorrera Galtzagorri elkarteak 2026ko urtarrilean Iruñeko Kondestablearen Jauregian antolatutako Bikoteka ilustrazio eta narraziogintza tailerrean izan zen. Bertan egin zuten bat lehen aldiz Naroa Martinezek eta Unai Ruizek, eta lankidetza hartatik sortu zen gero saritutako lana.

Aurtengoarekin, dagoeneko 17 dira Etxepare Sarian saritutako euskarazko album ilustratuak. Horietatik zortzi, gainera, 2017tik Galtzagorri elkarteak eta Iruñeko Udalak elkarlanean antolatzen duten Bikoteka tailerrean sortutako proiektuak izan dira.

Euskarazko album ilustratuen aldeko apustua

Etxepare Saria 2004an sortu zen euskarazko album ilustratuak sustatzeko eta argitaratzeko helburuarekin. Gaur egun, sorkuntza artistikoa bultzatzeaz gain, kulturaren bidez euskararen erabilera eta garapena indartzea ere badu xede.

Saria Nafarroako 23 toki-entitatek antolatzen dute urtero, beren euskara zerbitzuen bitartez. Antolakuntzan laguntzaile dira Pamiela argitaletxea eta Galtzagorri elkartea, eta Nafarroako Gobernuko Euskarabidearen babesa jasotzen du.

Egileak

Unai Ruiz (Bera, 1983) Arte Ederretan lizentziatua da. Margolari eta hezitzaile gisa lan egiten du, haur-eskoletako tailerrak gidatzen ditu eta gaur egun Leitzan bizi da.

Naroa Martinez (Gasteiz, 1987) psikopedagogoa eta euskal eskola publikoko irakaslea da. Galeraren eta doluaren arloan espezializatua da. Guraso.eus egitasmoko kolaboratzaile da azken urteetan.