Egunerokoan haur eta nerabeek askotariko egoerak bizi dituzte eskolan: desadostasunak, haserreak, gaizki-ulertuak edo, besterik gabe, euren emozioei hitzak jartzeko beharra. Horri erantzuteko, gero eta ikastetxe gehiago zirkulu errestauratiboak erabiltzen hasi dira, gatazkak sortu aurretik prebentzio gisa.

Parte-hartzaileak zirkuluan esertzen dira, denak maila berean, eta hitza txandaka hartzen dute. Helburua ez da inor epaitzea edo errudunak bilatzea, baizik eta elkar entzutea, emozioak partekatzea eta besteen ikuspegia ulertzea. Horrela, konfiantza, enpatia eta taldearen kohesioa lantzen dira.

Prebentzioaren beharra

Zirkulu errestauratiboak gatazkak konpontzeko erabiltzen badira ere, adituek azpimarratzen dute prebentzioan dagoela haien indargune nagusia. Ikasleek elkar hobeto ezagutzen dutenean, giro seguruagoa sortzen da eta etorkizunean sor daitezkeen arazoei beste modu batean heltzeko tresnak garatzen dituzte.

Horrez gain, hainbat ikastetxetan eguneroko jardunean ere txertatzen ari dira emozioei buruz hitz egiteko edo ikasgelako giroa hobetzeko. Esperientziek erakutsi dute ikasle guztiek hitza hartzeko aukera dutela, baita normalean isilenak direnek ere.

Zirkulu horietan hiru oinarri nagusi zaintzen dira: hitz egiteko txandak errespetatzea, besteak arretaz entzutea eta parte hartzea beti borondatezkoa izatea. Horrek espazio segurua sortzen du, haurrek eta gazteek askatasunez adierazteko aukera izan dezaten.

Gauzak horrela, zirkulu errestauratiboek bizikidetza lantzeko beste modu bat proposatzen dute. Metodo klasiko eta zaharkituetan aldenduta elkarrizketa, ulermena eta harremanak sendotzea ditu ardatz.

Iturria: Hik Hasi aldizkaria. Gaiari buruzko informazio gehiago: https://www.hikhasi.eus/eu/zirkulu-errestauratiboak-prebentziorako-tresna