Hastera doaz Hik Hasiren laborategiak. Ikasturtean zehar geletan ikasleekin behar diren tresnak eskuratzeko prestakuntza-guneak dira laborategiak. Astean zehar burutzen diren lau formazio-saioz osatuta daude, eta aditu batekin eta irakaskuntzan dabiltzan beste irakasle eta profesionalekin batera, gai jakin batean trebatzeko aukera eskaintzen dute.

Guztira, 10 laborategi eskainiko dira aurten. Lehenbizikoak irailaren 15ean eta 16an hasiko dira, Donostian eta Azpeitian, hurrenez hurren. Izena emateko azken egunak ere gerturatzen ari dira. Hemen klikatuz aurkitu daiteke laborategiei buruzko informazio osoa.

Irailak 15, 22 eta 29 eta urriak 6, Donostian

Hezitzaileen ongizateari buruz asko hitz egiten da azken garaiotan. Izan ere, gainezka daude gehienak egunerokoan pilatzen zaizkien zeregin eta eskakizun guztiei aurre egin ezinik. Denborarik eskaintzen al diogu, ordea, geure burua zaintzeari? Galdera horri helduko dio Eneritz Muguruzak, Hezitzailearen ongizatea ardatz: zeure burua zaintzeko tresnak izeneko laborategian. Ongizatea zaintzeko gakoak eskainiko ditu bertan.

Geletan aniztasun handia dago gaur egun, eta ikasle bakoitzak era jakin batean ikasten du. Irakasleak ikasteko estilo eta estrategia horiek ezagutzea lagungarria izan daiteke ikasleekin aritzeko. Horretarako, Iñaki Pikabeak Ikas-estiloen eta ikas-estrategien garrantzia hezkuntzan laborategia eskainiko du.

Bestalde, Feli Oregik Neurogarapena, hazkuntza eta ikasketa prozesuaren oinarrietako bat laborategia gidatuko du. Haurrek nola ikasten duten eta euren buruak nola funtzionatzen duen azalduko du, eta haurren neurogarapenean arreta jartzeko gakoak eskainiko ditu.

Irailak 16, 23 eta 30 eta urriak 7, Azpeitian

0-3 zikloan ari den hezitzaileak haurraren zaintza uneak izan ditzake ardura nagusitzat. Eider Gardek eskainiko duen 0-3 urte… laborategiaren bidez, etapa horretako hezkuntza-praktikan sakontzeko aukera izango dute parte-hartzaileek.