Behin baino gehiagotan jo dugu Era.eus egitasmora (euskarazko hezkuntza eta aisialdiko baliabideak eskaintzen dituen plataforma) eta gaurkoan ere Jolasak eta Solasak ekimena aurkezteko bertara joko dugu. Kaleko eta lagunarteko jolasak berreskuratzeko eta euskararen erabilera modu naturalean sustatzeko sortu da Jolasak eta Solasak bilduma. 30 bideoz osatutako bildumak haurrei zein familiei euskaraz jolasteko proposamen praktikoak eskaintzen dizkie.

Garai batean ohikoagoa zen haurrak kalean, plazan edo auzoan jolasean ikustea. Azken urteotan, ordea, eskolaz kanpoko jarduerek, pantailen presentziak eta eguneroko erritmoak eragina izan dute haurren aisialdian, eta lagunarteko eta kaleko jolasetarako tartea ez da beti lehen bezain handia.

Testuinguru horretan, jolasak duen garrantzia gogoratzea da Jolasak eta Solasak bildumaren helburuetako bat. Jolasean, haurrek hainbat gaitasun garatzen dituzte eta, aldi berean, hizkuntza erabiltzeko eta harremanetan euskaraz aritzeko aukera dute. Lagunarteko hizkera, esapideak eta hiztegia erabiltzeko testuinguru egokia ere bada jolasa.

Euskaraz jolasteak, gainera, hizkuntza bizipen atsegin eta dibertigarriekin lotzen laguntzen du. Jolas tradizional askotan abestiak, errimak, formulak, hitz-jokoak eta belaunaldiz belaunaldi transmititutako esamoldeak erabiltzen dira. Horrela, euskarazko harremanak indartu eta hizkuntza eguneroko bizitzan modu naturalean txertatzeko aukera eskaintzen du jolasak.

30 bideo, hainbat jolas eta proposamen

Helburu horrekin sortu da Jolasak eta Solasak bilduma. Guztira, 30 bideo biltzen ditu, eta askotariko jolasak ezagutzeko aukera eskaintzen du: goma-jolasak, sokasaltoa, esku-jolasak, zotz egiteko formulak, hitz-jokoak eta kantak, besteak beste.

Proposamenak kalean, plazan, eskola atarian edo lagunartean erabiltzeko pentsatuta daude, baina familian jolasteko ere baliagarriak dira. Bideoetako azalpenak laburrak eta argiak dira, eta, horri esker, jolas bakoitzaren nondik norakoak erraz ikas daitezke.

Bildumak, beraz, aspaldiko jolasak berreskuratzeko eta belaunaldi berriei ezagutarazteko aukera ematen du, baita ezezagunak diren proposamen berriak deskubritzeko ere.

Euskaraz jolasteko gonbidapena

Bideo guztiak ERAren YouTube kanalean daude ikusgai, transkribapenekin eta gaztelaniazko azpitituluak aktibatzeko aukerarekin.

Jolasak eta Solasak bildumaren bidez, euskaraz jolasteko beste aukera bat eskaini nahi da: lagunartean edo familian denbora partekatu, kaleko jolasak berreskuratu eta, batez ere, euskararekin lotutako bizipen atseginak sortu.

ERA Nafarroako toki-administrazioetako 28 euskara zerbitzuk bultzatzen dute, eta familien esku euskarazko baliabideak jartzea du helburu