Europako Batzordeak KIDS legea proposatu du, adingabeen babes digitalerako arau berriak ezartzeko. Besteak beste, sare sozialetako kontuen adin-mugak, adinaren egiaztapena, guraso-kontrolak eta zerbitzu digitalen diseinuari lotutako betebeharrak jasotzen ditu.

Proposamenak lau ardatz nagusi ditu: sare sozialetarako sarbidearen adin-mugak, segurtasuna diseinutik bertatik bermatzea, adina egiaztatzeko eta gurasoen erantzukizunerako neurriak, eta plataformen gaineko kontrola eta betearazpena. 

13 urtetik beherakoentzat, sare sozialik ez

Proposamenaren arabera, 13 urtetik beherakoek ezingo lukete sare sozialetako plataformetara sartu. Horien ordez, adingabeentzako bereziki diseinatutako zerbitzuak aurreikusten dira.

15 urtetik aurrera izango lukete adingabeek sare sozial batean euren kabuz kontu bat sortzeko aukera. Bien bitartean, 13 eta 15 urte artekoek kontu edo sarbide mugatuak izango lituzkete, gurasoen kontrol eta babes-neurriekin. KIDS legearen helburua da adin-irizpide bera ezartzea Europar Batasun osoan. 

Adingabeentzako zerbitzuek, halaber, gurasoei edukiak eta erabilera-denbora kudeatzeko tresnak eskaintzea aurreikusten da.

Erabilera “seguruagoa eta adingabeetara egokitua”

Bigarren ardatzak plataforma eta zerbitzu digitalen diseinuari eragiten dio. Proposamenaren arabera, adingabeek erabiltzen dituzten sare sozialek, bideo-plataformek, jokoek eta adimen artifizialeko agenteek segurtasuna kontuan hartu beharko lukete diseinutik bertatik. 

Besteak beste, proposamenak honako neurriak jasotzen ditu:

  • Adingabeengan mendekotasun emozionala edo erabilera konpultsiboa sustatu dezaketen diseinuak saihestea.
  • Adingabeak eduki kaltegarrietara bultzatu ditzaketen gomendio edo mekanismo batzuk mugatzea.
  • Ikus daitekeen eduki kopuruan mugak ezartzea.
  • Lo egiteko ordutegietan jakinarazpenik ez bidaltzea.
  • Erabilera-denbora mugatzeko aukerak eskaintzea.
  • Adingabeen profilak pribatuagoak izatea.
  • Geolokalizazioa lehenetsita ez egotea.
  • Kameraren eta mikrofonoaren erabilera mugatzea.
  • Edukiak eta kontaktuak blokeatzeko edo gomendio-sistemak doitzeko tresnak errazago eskuragarri izatea.

Proposamenak adimen artifizialeko agenteak ere hartzen ditu kontuan, eta adingabeen eta halako sistemaren arteko harremanetan mendekotasun emozionala sortzeko arriskuak saihesteko neurriak planteatzen ditu.

Adina egiaztatzeko sistema

Hirugarren ardatzak adingabearen adina egiaztatzeko mekanismoak arautzen ditu. Batzordeak proposatzen du egiaztapenak pribatutasuna errespetatu behar duela eta ez direla beharrezkoak izango erabiltzailearen identitatea baino informazio gehiago erakusten duten sistema inbaditzaileak. 

Plataformek adinaren inguruko zantzuak dituztenean, adina egiaztatzeko neurriak erabiltzea aurreikusten da. Europar Batasuneko estatu kideek ere zeregin bat izango lukete sistema horien ezarpenean.

Europako Batzordeak 2026an aurkeztutako adin-egiaztapeneko proposamenak erabiltzailearen identitatea babesteko eta adinaren froga modu seguruan partekatzeko mekanismoak ere jasotzen ditu.

Plataformen kontrola

Laugarren ardatza plataformen kontrolari eta betearazpenari dagokio. Plataformek eurek frogatu beharko dute beren zerbitzuak adingabeen adinerako egokiak eta seguruak direla. Horrela, proposamenak frogaren zama zerbitzu-hornitzaileengana eramaten du.

Kontrol-sistemak Europar Batasunak dagoeneko dituen arau eta mekanismoekin lotuko lirateke, bereziki Zerbitzu Digitalen Legearekin (DSA) eta adimen artifizialari buruzko Europako araudiarekin.

KIDS legeak, beraz, ez ditu soilik adin-mugak planteatzen: plataformen diseinua, adinaren egiaztapena, gurasoen kontrolerako tresnak eta zerbitzuen gainbegiratzea ere arautu nahi ditu. 

Beste neurri batzuk ere martxan

KIDS legearen proposamenarekin batera, Europako Batasunak adingabeen babes digitalarekin lotutako beste ekimen batzuk ere baditu. Horien artean dago ziberjazarpenaren aurkako ekintza-plana, eta haurren Interneteko erabilera seguruagoa eta alfabetizazio digitala sustatzeko estrategiak. 

KIDS legea, oraingoz, Europako Batzordearen proposamena da. Proposamenaren testuak eta dokumentu osagarriak Europako Batzordearen webgunean argitaratu dira.