Beldur Barik ikus-entzunezko lehiaketaren 17. edizioa martxan da. Emakundek sustatzen duen ekimen honek, gazteen artean indarkeria matxista prebenitzea du helburu. Horretarako, indarkeria erreproduzitzen duten jarrera eta mezuen aurrean begirada kritikoa sustatu eta harreman parekideak eta errespetuzkoak bultzatu nahi ditu.

Aurtengo edizioa Bilboko Urretxindorra Ikastolan aurkeztu dute, iazko lehiaketako irabazleak protagonista izan dituen ekitaldian. Ikasleek euren esperientzia eta hausnarketak partekatu dituzte, eta tailer bat ere egin dute indarkeria matxista izan daitezkeen egoerak identifikatu eta horiei aurre egiteko moduak aztertzeko.

Aurten, hiru kategoria

Adin-tartea zabaltzea da aurtengo berritasun nagusietako bat. Lehiaketan 10 eta 20 urte bitarteko gazteek parte hartu ahal izango dute, eta hiru kategoria izango dira: 10-11 urtekoena, 12-15 urtekoena eta 16-20 urtekoena. Horrela, lehen aldiz, Lehen Hezkuntzako 5. eta 6. mailako ikasleek ere parte hartu ahal izango dute.

Lehiaketara aurkezten diren lanek Beldur Barik Jarrera islatu beharko dute: indarkeria matxistaren adierazpenak identifikatzea eta horien aurrean jarrera kritikoa erakustea, eta harreman askeak, errespetuzkoak, parekideak, anitzak eta ez-sexistak eraikitzeko konpromisoa adieraztea.

Lanak ikastetxeen, gaztelekuen, aisialdi taldeen, elkarteen edo emakumeen etxeen bidez aurkeztu daitezke; baina gazteek banaka ere eman ahal izango dute izena. Parte hartzeko epea irailaren 22an hasi da eta abenduaren 1era arte egongo da zabalik eta izen-ematea Beldur Barik programaren webgunearen bidez egin beharko da.

Kategoria bakoitzeko irabazleek 650 euroko saria jasoko dute. Horrez gain, publikoaren sariak eta ikus-entzunezko lan onenarenak 200 euro eta liburu sorta bana izango dituzte. Lan sarituak 2027ko urtarrilean egingo den Beldur Barik Topaketan ezagutaraziko dira.

Iaz, ehun bat gaztek parte hartu zuten

Iazko edizioan, lurralde osoko ehun gazte inguruk hartu zuten parte Beldur Barik Topaketan, eta saritutako lanek gazteek gaur egungo berdintasunari eta indarkeria matxistari buruz dituzten kezkak erakutsi zituzten. Saritutako lanetan ondorengo gaiak jorratu zituzten: desberdintasun mediakoa, transexualitatea, estereotipoak eta rol zurrunak, maskulinotasun toxikoa sustatzen duten youtuber gazteak, espazio maskulinizatuen okupazioa eta maskulinotasun berrien aldeko apustua…

Aurtengo edizioarekin, antolatzaileek gazteen ahotsa indartu eta indarkeria matxistaren prebentzioa txikitatik lantzeko apustua egin dute. Emakunderen arabera, helburua da gazteei sentsibilizaziorako ez ezik, euren ahotsa erabiltzeko eta berdintasunezko harremanak eraikitzeko tresnak ere eskaintzea.

Ikus-entzunezko lan onenaren saria Donostiako AEG ikastetxeko Patroigintza eta Modako bigarren mailako ikasleek jaso zuten, Kahtarsi bideoagatik. Lanak desberdintasun mediatikoa jarri zuen erdigunean.

12 eta 16 urte bitartekoen kategorian, hainbat gai landu zituzten gazteek. Krisalida lanak transexualitatea izan zuen ardatz, eta banakako saria jaso zuen. Kalewinak lanak, berriz, estereotiporik eta rol zurrunik gabeko mundu bat irudikatu zuen modu umoretsu eta originalean, eta aipamen berezia eskuratu zuen.

Kategoria berean, taldeko lehen saria Youtuber Toxikoak lanarentzat izan zen. Urretxindorra Ikastolako ikasleek egindako bideoak maskulinotasun toxikoa sustatzen duten youtuberrek gazteengan izan dezaketen eragina aztertu zuen.

17 eta 20 urte bitartekoen kategorian, taldeko saria Oñati Institutuko Lanbide Heziketako ikasleen ‘Zu… Aldatzeko prest zaude?‘ bideoak jaso zuen. Lanak espazio maskulinizatuen okupazioa eta maskulinotasun berrien aldeko apustua izan zituen hizpide.