Bizkaiko Ehiza Federazioak txakurren eta falkoneriaren inguruko erakustaldiak egin ditu lehen aldiz Eskola Kirola programaren barruan. Erabakiak eztabaida sortu du eta Ekologistak Martxan-ek esaterako, jarduerak kentzeko eskatu dio Foru Aldundiari.

Bizkaiko Ehiza Federazioak lehen aldiz parte hartu du Bizkaiko Foru Aldundiak antolatutako Eskola Kirola programan, ehizarekin lotutako jarduerak ikasleei gertutik erakusteko. Besteak beste, ehiza-txakurren erakustaldiak eta falkoneria saioak egin dituzte. Federazioak “mugarri” gisa aurkeztu du ekimena, ehiza Euskal Herriko Eskola Kirolean lehen aldiz sartzen delako.

Jardunaldietan, ikasleek ehiza-txakurren lana eta hegazti harraparien hegaldiak ikusi ahal izan dituzte zuzenean. Federazioaren arabera, helburua da haurrei ehizan erabiltzen diren animalia laguntzaileak eta haiekin egiten diren zenbait diziplina ezagutaraztea. Datozen asteetan jarduerarekin jarraitzeko asmoa ere iragarri dute.

Desadostasunak sortu ditu

Ekologistak Martxan-ek, berriz, jarduera horiek Eskola Kirola programatik kentzeko eskatu dio Bizkaiko Foru Aldundiari. Erakunde ekologistaren ustez, ehiza adingabeei zuzendutako kirol eta jolas jarduera gisa aurkeztea ez dator bat haurren “errespetuan, enpatian, zaintzan eta indarkeriaren prebentzioan oinarritutako heziketarekin”.

Horrez gain, Aldundiari eskatu diote, azal dezala zein ebidentzia zientifiko eta irizpide pedagogikotan oinarritu den ehiza Eskola Kirolaren eskaintzan sartzeko erabakia. Ekologistak Martxan-en arabera, haurtzaroan animaliekiko krudelkeriaren eta indarkeriazko edo jokabide-arazo batzuen arteko loturak aztertu dira; horren aurrean, erakundeak enpatia, errespetua eta zaintza sustatzen dituzten jardueren alde egin du.

Natura ezagutzeko beste bide batzuk ere badaudela defendatu du; hala nola, fauna behatzea eta identifikatzea, arrastoak aztertzea, ingurumen-hezkuntza lantzea edo biodibertsitatearen kontserbazioarekin lotutako jarduerak egitea.