Gidak euskaraz plazaratutako 307 liburu aztertu ditu. Haur eta gazteentzako lanak biltzen ditu, hiru kategoriatan sailkatuta daude –gomendagarriak, oso gomendagarriak eta zerrenda berezia–, eta, irakurtzeko gutxi gorabeherako adina esleitu zaio liburu bakoitzari. Bost liburutegiko, bi ikastetxeko eta unibertsitateko ordezkariek hartu dute parte lantaldean. 1990ean hasi ziren gida egiten, eta, 2001az geroztik, edizio guztiak online daude kontsultarako.

Mondragon Unibertsitateko Humanitate eta Hezkuntza Zientzien Fakultateak Haur eta gazte literatura. Irakur gida. 2025 eman du argitara. 2025ean haur eta gazteentzat euskaraz argitaratu ziren 307 liburu aztertu eta sailkatu ditu.

Helburua da orientazio-tresna bat eskaintzea familiei, irakasleei, liburutegietako profesionalei eta irakurzaletasuna sustatzen duten beste entitateei, euskarazko haur- eta gazte-literaturako lanak aukeratzeko.

Gida egiteko lantaldean, hamaika profesional aritu dira: Olga Jauregi, Aramaioko Udal Liburutegikoa; Laida Zubia, Bergarako Udal Liburutegikoa; Oskar Loiti, Eskoriatzako Udal Liburutegikoa; Jasone Erostarbe, Legazpiko Udal Liburutegikoa; Marina Etxegoien eta Arantzazu Ibarrondo, Oñatiko Udal Liburutegikoak; Garbiñe Txintxurreta eta Joxe Otaduy, Aretxabaletako Kurtzebarri Eskolakoak; Ana Etxeberria, Eskoriatzako Luis Eceiza Eskola Publikokoa, eta Eunate Arebiotorre eta Marikarmen Apraiz, Mondragon Unibertsitatekoak —azken hori koordinatzaile-lanetan—. Lehen Hezkuntzako Graduko ikasle Naroa Garayar arduratu da azala diseinatzeaz eta gida maketatzeaz.

Balioztapena eta kategorizazioa

Euskaraz idatzitako lanak irakurri dituzte adituek, eta euren irakurketak kontrastatu; liburu bakoitzaren zenbait alderdi baloratu dituzte, hala nola hizkuntzaren erabilera, kalitate literarioa eta gaien tratamendua. Ondoren, hiru kategoriatan sailkatu dituzte lanak: liburu gomendagarriak, liburu oso gomendagarriak eta zerrenda berezia, hautatutako lan bakoitzaren erreseina ere baduena.

Halaber, titulu bakoitza irakurtzeko gutxi gorabeherako adina iradokitzen du gidak. Hala ere, lantaldeak gogorarazi duenez, sailkapen hori orientagarria baino ez da, haur guztiek ez baitituzte erritmo, interes eta zaletasun berak.

Ildo horretan, gidaren egileen ustetan, garrantzitsua da haurrek liburuak askatasunez aukeratzea, funtsezkoa baita irakurzaletasuna sustatzeko.

Esteka honen bidez deskarga daiteke gida: Irakur gida. 2025.