Azaroaren 17an eta 24an izango dira saioak, Dinamoa sormen gunean eta Azpeitiko Udal Liburutegian. Haurren liburuekiko interesa piztu, irakurzaletasuna sustatu eta irudimena garatzeko tresnak emango ditu Dorleta Kortazar gizarte-hezitzaile eskoriatzarrak. Zabalik da izen ematea hemen.

Haurrak liburuetara gerturatu eta irakurzaletasuna sustatzea da Nola aukeratu irakurgai on bat? tailerraren helburua. Dorleta Kortazar gizarte-hezitzaileak haur zein gazteen irakurgaiak ondo aukeratzeko gomendioak eta tresnak emango ditu. Bi saio izango dira, 17:30etik 19:30era: lehenengoa azaroaren 17an Dinamoa sormen gunean, eta bigarrena azaroaren 24an Azpeitiko Udal Liburutegian.

Ikastaroak liburuak ezagutzeko, marko teorikoa partekatzeko eta, batez ere, hausnarketak eta zalantzak argitzeko aukera eskainiko du. Adituek behin eta berriz azpimarratzen dute liburuak eta ipuinak ezinbesteko tresna direla fantasia eta irudimena garatzeko, batez ere umeen bizitzako lehen urteetan. Izan ere, ipuinek gurasoekiko lotura afektiboa sendotzen laguntzen dute, haurrei barrura begiratzeko aukera ematen diete, eta irudimena zein jakin-mina pizteko abagunea dira.

Era berean, literaturak bizipenak modu seguruan esperimentatzeko eta bizitzarako garrantzitsuak diren tresnak eskuratzeko aukera ematen die haurrei. Ikastaro honetan, sinbolismoz eta jakintzaz betetako istorioak landuko ditu Kortazarrek; horiek guztiak tresna paregabea izango dira guraso eta hezitzaileek haur zein gaztetxoekin lanketa sakonak egin ditzaten.

Formazioz gizarte-hezitzailea eta gizarte eta kultur suspertzailea da Dorleta Kortazar. Gazteriaren alorrean 27 urtez lanean ibilia da, eta ipuinak kontatzen dihardu azken bederatzi urteetan.