Euskarazko murgiltze eredu integralago baterako bideak aztertuko dituzte azaroaren 18an Donostiako Kursaalen egingo dituzten Euskal Herriko Ikastolen 30. Jardunaldi Pedagogikoetan. Euskalduntzen duen hezkuntza: erronkak eta estrategiak izenburupean, bertako eta nazioarteko adituek hezkuntza formalaren, ez-formalaren eta informalaren arteko loturak lantzea izango dute ardatz, euskararen erabilera sustatzeko estrategiak garatzeko.

Jardunaldien helburua ez da murgiltze eredua defendatzea bakarrik; orain arte egindako bidea aztertu, haren indarguneak eta ahulguneak identifikatu eta gaur egungo erronkei erantzuteko neurriak proposatzea ere bada.

Jardunaldiko programa

Inaugurazio hitzaldia Iñaki Iurrebasok emango du, Udalerri Euskaldunen Mankomunitateko (UEMA) ikerketa arduradunak. Honi buruz jardungo du: Gizarteak eskola baldintzatzen du, eskolak gizartea eraldatzen du. Hezkuntzaren ekarpenak, mugak eta erronkak euskararen indarberritzean.

Ondoren, hiru gai nagusi jorratuko dituzte. Kike Amonarriz soziolinguista ezagunak ikasgelatik eta ikastetxetik harago euskararen erabilera sustatzeko bideak aztertuko ditu, bereziki familien eta aisialdiaren garrantzia kontuan hartuta. Errealitate demografiko berrien aurrean harrera eta inklusioa izango dira bigarren gaiaren ardatzak: Anna Forések, Bartzelonako Unibertsitateko Neurohezkuntza Katedrako zuzendariak, ikasleen ongizate emozionalak hizkuntzen ikaskuntzan duen eragina landuko du; Vicent Climent-Ferrandok, Pompeu Fabra Unibertsitateko zientzia politikoetako doktoreak, berriz, hizkuntza gutxituek aukerak izan ditzaten beharrezkoak diren baldintza sozial eta instituzionalak aztertuko ditu.

Hirugarren gaiak gaitasuna, atxikimendua eta erabilera izango ditu hizpide, Letizia Garcia Mondragon Unibertsitateko irakasle-ikertzailearen eskutik. Hiru alderdi horien arteko harremanean sakonduko du, euskararen erabilera sustatzeko gakoen bila. Amaitzeko, Siwan Jonesek Galeseko esperientzia azalduko du. Galeseko hezkuntza- eta hizkuntza-politikaren arduradun nagusietako bat da, eta hizkuntza gutxitu baten ikaskuntza eta erabilera bultzatzeko garatutako estrategia integrala aurkeztuko du, murgiltze ereduaren ikuspegi zabaletik.

Jardunaldietan parte hartzeko izen-ematea zabalik dago ikastolak.eus atarian. Hezkuntza arloko arduradun eta profesionalek ez ezik, gaiarekiko interesa duten familiei eta herritarrek ere eman dezakete izena.

Egitaraua

  • 09:30etik 09:45era: Jardunaldiaren irekiera ofiziala.
  • 09:45etik 10:00etara: Harrera instituzionala.
  • 10:00etatik 10:45era: Inaugurazio-hitzaldia.
  • 10:45etik 11:30era: Lehenengo erronka.
  • 11:30etik 12:00era: Atsedenaldia.
  • 12:00etatik 13:00era: Bigarren erronka.
  • 13:00etatik 14:30era: Atsedenaldia.
  • 14:45etik 15:30era: Hirugarren erronka.
  • 13:00etatik14:30era Atsedenaldia.
  • 15:30etik 16:30era: Galesko esperientzia.