Haurrei kulturartekotasuna eta migrazioa gerturatzeko, Xor eta Beltz, mundu bat guztiontzat liburu ilustratua eta unitate didaktikoak sortu dituzte Hernanin. Iñaki Sanz-Azkue biologoak eta Maialen Diaz de Zerio irakasleak idatzi dute istorioa, eta Ane Aierbek egin ditu ilustrazioak.

Xor Euskal Herrian jaiotako sorbeltza da, eta negua igarotzeko migrazio-bidaia hasiko du. Bidean, Beltz ezagutuko du, eta elkarrekin mundua ezagutuko dute. Bi hegaztien bidaiaren bidez, gizakien migrazioaren eta kulturen arteko harremanen inguruko gogoeta proposatzen du liburuak.

Proiektua Urumea ikastolako errealitatetik abiatu zen, ikasgelan lantzeko istorio gisa. Ondoren, urtebetez material didaktikoa prestatu zuten, eta Alberdania argitaletxearen eskutik liburu ilustratu batean bildu dute. QR kode baten bidez, irakasle eta ikasleentzako koadernoak, jokoak eta bestelako material pedagogikoa eskura daitezke.

Hernaniko ikasgeletan probatu dute dagoeneko, baina egileek Euskal Herriko beste ikastetxeetara ere zabaldu nahi dute proposamena. Horretarako, Gasteizko, Amaiurko eta Ordiziako irakasleen ekarpenak jaso dituzte. Maialen Lujanbiok, gainera, bertso bat sortu du proiekturako: «Jolasean umeak / hegaka sorbeltzak / zeru beraren pean / mundu bat denentzat».