Ainize Sarrionandia ikertzaileak zuzendutako proiektu batek gurasoen burnout-a aztertuko du Euskal Herrian, gurasoen sentikortasunak eta arreta mantentzeko zailtasunek fenomeno horretan izan dezaketen eragina hobeto ulertzeko.

Guraso izatea esperientzia aberasgarria da, baina baita erronka handikoa ere. Eguneroko zaintzak, ardurek, lanak, lo faltak eta familiaren beharrak uztartzeak neke handia eragin dezakete. Batzuetan, neke hori ez da atseden hartuta desagertzen, eta guraso izateak dakarren akidura sakonago bihur daiteke. Horri gurasoen burnout-a esaten zaio.

Fenomeno hori hobeto ezagutzeko, Ainize Sarrionandiak zuzendutako ikerketa batek Euskal Autonomia Erkidegoan bizi diren amen eta aiten esperientziak aztertuko ditu. Helburua da ulertzea zergatik eragiten dien gurasotasunaren eguneroko zamak pertsona batzuei besteei baino gehiago.

Ikerketak bi ezaugarri pertsonaletan jarriko du arreta berezia. Batetik, prozesamendu sentsorialarekiko sentikortasuna aztertuko du. Hau da, pertsona batzuek inguruko estimuluak —zarata, argiak, mugimendua edo bestelako sentsazioak— biziago hautemateko duten joera. Etxe batean, umeen negarrak, oihuak, etengabeko mugimenduak eta estimulu ugari egoteak eragin handiagoa izan dezakete pertsona horiengan.

Bestetik, arreta-defizitaren eta hiperaktibitatearen nahasmenduarekin (ADHN) lotutako sintomak ere aztertuko ditu helduen artean. Arreta mantentzeko zailtasunak, antolatzeko arazoak edo eguneroko zereginak kudeatzeko ahalegin handiagoa, esaterako, gurasotasunaren erronkekin nola lotzen diren ikertu nahi dute.

Baina ikerketak ez du soilik ezaugarri horiek gurasoen nekean duten eragina aztertuko. Alderantzizko noranzkoa ere aztertu nahi du: gurasoen burnout-ak sentikortasunean edo arreta mantentzeko gaitasunean eragin ote dezakeen.

Horretarako, Euskal herrian bizi diren amak eta aitak hiru aldiz ebaluatuko dituzte, gutxi gorabehera hiru hilabeteko tartearekin. Parte-hartzaileek galdetegiak beteko dituzte, eta beren egoera pertsonalari eta familiarrari buruzko informazioa ere jasoko da.

Gurasoen ongizatea ere zaindu beharrekoa da

Gurasoen burnout-a ez da nekea edo egun txar bat izatea soilik. Denboran luzatzen den akidura-egoera da, eta gurasoen ongizate emozionalean nahiz seme-alabekin duten harremanean eragina izan dezake.

Ikerketa honen bidez, guraso batzuek zergatik izan dezaketen zaurgarritasun handiagoa ulertu nahi da. Ezaugarri pertsonalak hobeto ezagutzeak aukera eman dezake familiei laguntza egokiagoa eskaintzeko, egoera zailak garaiz identifikatzeko eta prebentzio-neurriak garatzeko.

Azken batean, gurasoen ongizatea zaintzea ere seme-alaben ongizatea zaintzea da. Gurasoak hobeto ulertzea eta haien beharrak kontuan hartzea funtsezkoa da familia osasuntsuagoak eta ongizate handiagokoak eraikitzeko.

Parte hartu ikerketan