Pirritx, Porrotx eta Marimototsen proiektu berria da Musu bete urte, Leire Bilbao idazleak sortutako eta Maite Mutuberriak ilustratutako ipuin-liburua. Urriaren 30ean aurkeztu zuten jendaurrean Lasarte-Orian, eta haurrei zein helduei zuzendutako proposamen goxo eta poetikoa da. Guk Leire Bilbaorekin hitz egin dugu proeiktuaren bere begirada ezagutzeko.

Lau urtaroen bidez, liburuak denboraren igarotzea beste modu batean begiratzeko gonbita egiten du: musuen, laztanen, maitasunaren eta elkar zaintzearen bidez. Naturak eta euskal ohiturek ere badute beren lekua istorioan, urteko zikloari eta gure kulturari lotutako une eta ospakizunak bidaia berean bilduz.

Musu bete urte ez da ipuin bat bakarrik; familian partekatzeko, irakurtzeko, sentitzeko eta elkarrekin hitz egiteko aukera ere bada. Izan ere, eguneroko keinu txikiek, maitasunez emandako musu batek kasu, urte oso bat bete dezakete.