Saguganbarak haur eta gaztetxoentzako eskaintza kulturala bilduko du Durangoko Azokan
Durangoko Azoka abenduaren 4tik 8ra egingo dute aurten, eta Landako Gunea euskal kulturaren erakusleiho bihurtuko da beste urte batez. Guztira, 174 partaidek hartuko dute parte, eta 286 erakusmahai jarriko dituzte. Bertan, 2026an argitaratutako 1.098 kultur nobedade egongo dira eskuragarri: 681 liburu, musikarekin lotutako 177 lan, 57 aldizkari eta beste 156 argitalpen, tartean jolasak, laminak eta papertegiko produktuak.
Azokak, ohi bezala, haur eta gaztetxoei zuzendutako gunea ere izango du: Saguganbara. Aurkezpenak, ipuin-kontaketak, tailerrak eta ikuskizunak izango dira bertan, etxeko txikienek euskarazko kultur eskaintza ezagutzeko eta gozatzeko aukera izan dezaten. Aurten, gainera, tailerren eskaintza indartu dute. TOKIren eskutik, Euskal Herrian sortutako mahai eta karta jokoak ezagutzeko eta probatzeko aukera izango da. Abenduaren 8an, bestalde, Asun Casasola Elkarteak helduentzako tailer bat egingo du, haur literaturan inklusibitatea lantzeko. Egitarauko jardueretatik kanpo ere zabalik egongo da Saguganbara, Azokako nobedadeak eta aurreko urteetako argitalpenak lasai ezagutzeko.
Saguganbarako egitaraua, egunez egun
Abenduak 4
- 10:00-11:30 Herrialde ikusezinak. Amaia Egidazuren eskutik, haurrek deskubritu gabeko leku bereziak asmatuko dituzte, eta sormen-tailerraren bidez artefaktu bat sortuko dute.
- 12:00-13:30 Herrialde ikusezinak tailerraren beste saio bat.
- 16:00-16:30 Mimosa bat loretan liburuaren aurkezpena eta irakurketa. Garazi Kamio, Irene Irureta eta Mirentxu Ibargarai izango dira bertan. Ainhizeren ametsak eta norberak bere bidea aukeratzeko dituen zailtasunak lantzen ditu albumak.
- 17:00-18:00 Musu bete urte liburuaren aurkezpena. Pirritx, Porrotx eta Marimotots pailazoek eta Leire Bilbaok musuen inguruko galderak eta bitxikeriak partekatuko dituzte.
- 18:30-19:00 Ospa, egurgile! ipuin-kontaketa. Mariñe Jauregik eta Mitxel Elortzak naturaren zaintza eta enpatia landuko dituzte. Kontakizunarekin batera, ilustrazioak zuzenean sortuko dituzte, pianoaren musikaz lagunduta.
Abenduak 5
- 12:45-13:15 Eire Moon bilduma liburuen aurkezpena. Lur Gallastegik eta Paula Morenok 10 eta 12 urte arteko gaztetxoei zuzendutako bi liburu aurkeztuko dituzte: Azken fiordoa eta Plastiko-inbasioa koral-arrezifean.
- 13:30-14:00 Ortupoemak liburuaren aurkezpena. Leire Bilbaok eta Yolanda Mosquerak baratzeko biztanleen istorioak eta ezkutuko kontuak ezagutaraziko dituzte.
- 17:00-17:30 Zapaburuarena eta Erraldoiarena ipuin-kontaketa. Lukene Igartua Egañak Urbiara egindako mendi-irteera batean zapaburu-arrautzak aurkitzen dituzten bi haurren istorioa kontatuko du.
- 18:00-18:30 Lurpeko eskaileren misterioa. Antton Kazabonek eta Leire Iparragirrek liburuaren aurkezpena egingo dute.
- 18:45-19:15 Xele eta Xuri, bi lagun bidaiari liburuaren aurkezpena, Antton Kazabonen eta Jokin Mitxelenaren eskutik.
Abenduak 6
- 12:00-12:45 Potx magoaren kutxa magikoaren aurkezpena. Potx magoak magia, umorea eta ikusleen parte-hartzea uztartuko dituen ikuskizuna egingo du, objektu arrunten sekretuak azaleratuz.
- 13:00-13:30 POX, MOX eta TRUMOI. Ederra kasketa! liburuaren aurkezpena. Yolanda Arrietak eta Ane Arzelusek iratxo protagonisten istorioa aurkeztuko dute.
- 13:45-14:15 Animalien ahotsa liburuaren aurkezpena. Olatz Aranceta Rebodero eta Leire Morrás Arano egileek haur eta nerabeei zuzendutako liburu ilustratua aurkeztuko dute. Animalien bizitza eta gizakiok haiekin dugun harremana ditu hizpide.
- 16:00-17:30 TOKI: Euskaraz sortu. Euskaraz jolastu. Tailer honetan Euskal Herrian sortutako mahai- eta karta-jokoak ezagutzeko eta probatzeko aukera izango da.
- 18:00-18:30 Kokolulu: Itsas Erronka Marraztua, Eider Eibar eta Iskander Sagarminagaren eskutik.
Abenduak 7
- 12:30-13:00 Mimuk liburuaren aurkezpena. Dorleta Kortazarrek, Alaia Martinek eta Udane Ansak alergia duen haur baten sentipenak kontatuko dituzte. Bakardadea, desberdintasuna eta laguntasuna lantzen ditu istorioak.
- 13:30-14:15 Etxerik etxe, NAITA Produkzioak taldearen eskutik.
- 17:30-18:00 Etxea, norberarena liburuaren aurkezpena. Izaskun Jauregi eta Maitane Gartziandia izango dira aurkezleak.
Abenduak 8
- 11:15-11:45 Parrast! liburuaren aurkezpena eta ipuin-kontaketa. Amaia Egidazuk gaztelu bateko putzuan bizi den krokodilo baten istorioa kontatuko du.
- 12:00-13:00 Supituki Txiki Show ikuskizuna. Supituki Antzerkiak haurrentzako inprobisaziozko antzerki saio parte-hartzailea egingo du.
- 12:00-13:15 Sustraitik eraldatuz: Haur literatura inklusibitatearen aldeko aliatu tailerra. Asun Casasola Elkarteak antolatuta, haur literaturan genero-ikuspegia eta aniztasuna aztertuko dituzte, ipuinek transmititzen dituzten rolak eta estereotipoak landuz. Helduentzat zuzendutako jarduera da.
- 13:30-14:00 Harroxko liburuaren aurkezpena. Oihane Jakak eta Irati Peluagak mundu arrosa batekin amesten duen lehoi horiaren istorioa aurkeztuko dute, aurreiritziak eta estereotipoak zalantzan jarriz.
Iruzkinik ez "Saguganbarak haur eta gaztetxoentzako eskaintza kulturala bilduko du Durangoko Azokan"