Izaskun Marañon psikologo pasaitarrak zeloiei aurre egiteko gakoak eman ditu. Ezer baino lehen, zeloak zer diren argitzea “ezinbestekoa” dela esan du Pasaiako psikologoak “bigarren haurraren etorrera osteko jarrera okerrak justifikatzeko” zenbaitetan erabili ohi den arrazoia dela uste baitu.

Captura de pantalla 2014-12-12 a las 13.39.12

Marañonen esanetan, zeloen iturria gurasoen arreta gabezia da, eta haurrek iritsi berri den anai edo arrebari egozten diote horren errua. Hortik, anai-arreben aurkako jarrerak.

Zeloei aurre egiteko gakoak

Sinplea bezain eraginkorra da Marañonek zeloen irtenbide gisa aurkezten duen aholkua: “Haur batek gurasoen maitasuna bermatuta duenean desagertu egiten dira zeloak”, dio. Horrez gain, zeloen aurrean, haurren beharrei entzutea, anai- arrebekin ez konparatzea, eta haur bakoitzarentzat denbora esklusiboak izatea lagungarria dela azaldu du.

Okerrak diruditen jarreren aurrean, berriz, egoera edota haurraren sentimenduak “ukatu eta epaitu” ordez, horiek analizatu eta kanalizatzean dago gakoa, “arazoak onartzean euren indarra gutxitzen delako”.

Haurrek, beraz, gurasoen gertutasuna behar dute, eta Marañonen hitzetan, askotan, zigorren bidez okertu egiten da egoera, “pentsatzeko txokoa” bezalako neurriek oraindik gehiago urrutiratzen dituztelako.