Ikasketetan zailtasunak dituzten ikasleentzako gomendioa: “Begiratu ikasturteari aukera berri bat izango balitz bezala”

 
Ikasle eta guraso askok arduraz begiratzen diote ikasturte berriari. Jon Arruabarrena psikologoaren gomendioak argiak dira: “Ikasleei esango nieke ikasturte berri baten aurrean daudela. Zerotik hasten direnez, ez dituzte zertan aurreko akatsak errepikatu. Gurasoei dagokienez, irakasleenganako harremanak sendotzea komeni da”, adierazi du Anboto aldizkarian.

Ikasketa arazoak dituzten ikasleekin dihardu lanean Arruabarrenak. Bere kontsultan irakurketa lantzen dute gehien. “DBHko ikasleekin irakurketa mekanikoari baino ulermenari ematen diogu garrantzia. Laburpen, eskema edo mapa kontzeptual bat egiten jakiteko 12 urterekin izaten den logika behar da. Ikasle gazteagoekin teknikak baino ohitura onak lantzen ditugu. Esate baterako, agenda bat erabiltzen irakasten diegu”, azaltzen du psikologoak.

Motibazio falta eta ahaleginaren balioa

Adituak gehien ikusten duen arazoa motibazio falta da. “Ikasle onak oso motibatuta egoten dira, baina beste ikasle batzuk, aldiz, ez. Gaitasun batzuk izan arren, adimenari eta irakurmenari dagokionez, gasolina hori falta zaie. Motor ona izan dezakete, baina gasolina barik ez doaz inora. Kasu horretan gasolina motibazioa izaten da; gogo barik joaten dira klasera, aspertu egiten dira, eta besteei molestatzen diete”, azaltzen du.

Baina nola motibatzen dira ikasleak? Arruabarrenak eskolara zertarako joaten diren galdetzen omen die. “Denok dakigu etorkizunean bizimodu eroso bat eta soldata on bat ateratzeko izan daitekeela. Baina horri letra larriz idatzitako motibazioa deitzen diot. Beste motibazio bat, letra xehez idazten dena, eguneroko konstantzia da. Eguneroko ahalegina zelan irakasten da? Etxean zein gelan ahaleginaren balioa irakatsi behar zaie. Gainera, gazteek ez dute nagusien motibazio bera. Beraiek gustuko dituzten sariekin lortu daiteke motibazioa. Barruko motibazioa izatea oso zaila da. Beraz, kanpoko motibazio bat izan dezake, gauza materialak zein immaterialak”.

Elkarrizketa osorik eta argazkiaren iturria Anboto.org atarian.