Elkarrizketaren bidez landu daiteke pentsamendu autonomoa eta sortzailea

Elkarrekin hobeto pentsatzen dugu. Maxima horretatik abiatzen da Haur Filosofia. Eta Miren Camison irakasleak badu proposamen bat: uste du eztabaidaren eta negoziazioaren kultura dela nagusi gizarte honetan, eta interesgarriagoa dela elkarrizketaren kultura bultzatzea. “Ez dago ez irabazlerik ez galtzailerik”, dio. Bestetik elkarrizketa eta komunikazio enpatikoa ezinbestekotzat jotzen ditu umeek eta gazteek pentsamendu kritikoa eta sortzailea eraiki ahal izateko.

60ko hamarkadan abiatu zuen Haur Filosofiaren proiektua Matthew Lipman irakasleak. Zabaldurik dago pentsamendua norberak, bakar-bakarrik, garatzen duela, baina Camisonek argi dauka hobeto pentsatzen dela taldean: “Besteek zuk ez dauzkazun ikuspuntuak eta bizipenak dituzte, eta horrek aberastu egiten du norberaren pentsamendua”, dio.

Elkarrizketan (ez eztabaidan ez negoziazioan) pentsamendu kritikoa eta sortzailea lantzen dira, baldin eta testuinguru egoki baten garatzen baldin bada. Camisonek proposatzen duen teknikan umeak eta irakaslea borobilen esertzen dira berdintasunezko erlazio bat sortzeko, eta entzumenaren zein galderaren pedagogia lantzen dira. Irakasleak elkarrizketa erraztuko du, baina ez epaitu. Hau da, galderen bidez sakonago pentsatzen lagunduko du. Haurren interesekoak izan behar dute lantzen diren gaiak eta adinaren arabera izan daitezke osasuna, heriotza…

Ahal dela txiki-txikitatik barneratu beharreko kultura gisa planteatzen du Camisonek.

Uztaileko ikastaroan emango ditu argibide gehiago.

Artikuluaren eta argazkiaren jatorria hemen.