Neska-mutikoek gehiago ikasten dute ikusten dutenetik entzuten dutenetik baino.

“Nork esan dio umeari oinetako azazkalak margotzeko? Eta ez margotzeko? Seguruenik ez bata ez bestea. Akaso margo horiek ez ukitzeko esango zioten, baina jarrera bat imitatzen ari da umea”. Adibide horrekin azaltzen du Armando Bastidak bere blogean gurasoak eredu izateak ze garrantzia duen. Dio alperrik dela gauzak hitzez agintzea gure jarrerekin ez bagara eredu. “Imitazioaz ikasten dute umeek, ikusten dutena egiten dute“.
Guraso.com atarira ekarri dugu Bastidaren blogeko sarrera interesagarria iruditzen zaigulako bertan egiten duen gogoeta. Adibide gehiago ere ipintzen ditu: Umeari esaten diogunean: Kontatu didaten sekretu bat kontatuko dizut, baina ez esan inori zer ikasiko du umeak? Berak ere berdin joka dezakeela. Ez dela hain garrantzitsua sekretuak gordetzea”.

Bastidaren esanetan umeek gehiago ikasten dute ikusten dutenetik entzuten dutenetik baino, eta hezitzaileek jai daukagu gure jarrerarekin guk geuk esandakoak indartzen ez baditugu. “Aginduak eta gomendioak entzun entzuten dituzte, baina zure jarreran ez badago koherentziarik sinesgarritasuna eta autoritatea galduko dituzu”, jakinarazten du.

“Ez gara perfektuak. Ezin gara perfektuak izan, baina saiatu egin behar dugu. Hezteko intentzioarekin ari ez garenean egiten ditugunekin hezten ditugu gehienbat gure neska-mutikoak”, dio.

Albistearen iturria hemen.