Bi eta lau urteko umeek egunean, bataz beste, 400 agindu jasotzen dituzte
Agindu gehiegi direla diote adituek, eta taktika askoz ere eraginkorragoak badaudela.
“Altxa!”, “Jantzi!”, “Ez jo!”, “Jan!”… Egunean 400 agindu asko dira. Ezinezkoa da umeak guztiak betetzea eta oso dinamika nekagarria da hezitzailearendako. Egia da gurasook garela umeen segurtasuna eta ongizatea bermatu behar dugunak, baina aginduez gain bestelako formulak ere badaudela ohartarazten gaituzte Bebesymas.com webgunean. “Ezinezkoa da haurrak agindu horiek guztiak betetzea bi eta lau urte bitarteko etapan senak, modu oso indartsuan, mundua esploratzeko eskatzen dionean”, diote. “Arauak ezartzea garrantzitsua da baina gutxi eta argiak izan behar dute”.
Irudimen gehiago
Bestelako taktikak erabiltzeko gomendioa egiten dute adituek. “Ikusten dugunean umea asaldatuta dagoela aginduak ematea baino eraginkorragoa da askotan proposamenak egitea: “Margotuko dugu?”, “Jolastuko duzu jostailu horrekin?”… Umeak askotan aspertuta daude eta ez dakite egoera horri ze konponbide eman”, adierazten dute. “Askotan nahikoa da zer egin dezaken proposatzea gogaitzen gaituen jarrera horretatik umearen arreta desbideratzeko”.
Irudimena gehiago erabiltzeko eskatzen digute adituek umeari behin eta berriro ezezkoetan oinarritutako aginduak ematea baino.