Ramon Olasagastik irabazi du Lizardi Saria ‘Sugaar’ ipuinarekin

17 lan aurkeztu dira aurten Haur eta gaztetxoentzako literatura suspertzea helburu duen 32. Lizardi Sarira. Ramon Olasagasti (Berrobi, 1972) kazetari, itzultzaile eta idazleak irabazi du, Sugaar ipuinarekin. Olasagastik 3.700 euro jasoko ditu eta bere lana argitaratu egingo da.

Lizardi Saria Zarauzko Udaleko Kultura sailak antolatzen du. Jesus Mari Olaizolak Txiliku, Miren Agur Meabek, Iñaki Frierak eta Gari Berasaluzek osatutako epaimahaiak aukeratu du Olasagastiren lana. Epaimahaiako kideek argitu dutenez: “Istorio klasikoa da, baina oso ondo egituratuta dagoena. Misterio puntua ere badu, eta amaiera biribileraino erraz bideratzen du irakurlea, oso euskara sanoan idatzitakoa. Pertsonaia asko agertu arren, orekaz antolatuta dago narrazioa, eta haurrek gustura irakurtzeko moduko lan ederra da. Uste okerrei eta sineskeriei buruzko istorioa da”.

Albistearen eta argazkiaren iturria Galtzagorri.