UEUk bere udaberriko eskaintza aurkeztu du. Otsaila eta maiatza bitartean 23 ikastaro eskainiko ditu UEUk on-line, Eibar, Iruñea, Gasteiz eta Bilbon. Matrikula zabalik dagoIkastaro hauetako batzuk guraotasunarekin edo hezkuntzarekin lotuta daude. Hona hemen hauetariko batzuk.

Nola hezi genero-berdintasunean eskolaren eremuan

Androzentrismoaren arabera antolatuta egonik, egungo hezkuntza-sistemak generoaren ikusmolde estereotipatua eta sexista transmititzen jarraitzen du. Izan ere, askotan irakasleek, eskolako langileek, ikasmaterialek, eskolaren antolaketak eta bestek, nahi gabe ere, oso barneratuta dauden generoari buruzko uste, balio eta ohitura sexistak transmititzen dituzte. Egoera hori aldatu eta hezkuntza-sisteman –eta bereziki, ikasgelan- hezkidetza nola susta daitekeen azalduko da ikastaro honetan.

Askatasunean hazi, hezi eta bizi

Askatasunaren printzipioa eztabaidaezina izanik, gure bizitzaren ardatz bilakatzen saiatzea da gutako askoren erronka. Guretzat bezala, biziki garrantzitsua da haurrentzat ere askatasuna ukan dezaten euren bizitza eraikitzeko eta diren bezala garatzeko, barnean duten eta diren hori osoki loratuko bada, bederen. Helduaren nortasunaren konfigurazioan haurtzaroak duen garrantziagatik, bizitzaren lehen urteak kalitatezkoak izatea behar du izan edozein prebentzio-eredu edo -programaren helburu nagusiak. Hori baita geroko gaixotasunak ekiditeko modurik seguruena eta eraginkorrena. Helduoi dagokigu, bada, guraso, hezitzaile edo gizarteko kide soil gisa, haurren bizitzaren kalitatea bermatzea, askatasuna, atxikimendua, errespetua eta zaintza kontzientea erdigunean izanen duen haziera eta heziketa-eredu integralak sustatuz. Haurrenganako gure begiradaren aldaketa ekarriko duen paradigma-aldaketa erabat beharrezkoa dugu, eta horretara dator, hain zuzen ere, ikastaroa. Haurtzaroan sano eta oso garatzeko haurrek behar dituzten ekosistema ezberdinen nolakotasuna aztertzera, eta kalitatezko bizitza batek —haurrenak bezala gureak ere— ukan beharreko printzipioen inguruan hausnarketa proposatzera.

Ikas komunitatea ikasketa dialogikotik abiatuta

Ikas komunitate bat sortzeko beharrezkoa dena agertuko da. Euskal Herrian dauden esperientzia ezberdinak ezagutu eta bakoitzaren zentrora gehien gerturatzen den eredua identifikatzeko. Ikas komunitate bat sortzeko jarraitu beharreko pausuak aurkeztuko dira. Komunitatea sortu aurretik ordea, bide horren alde apustu egiteko kontzientziazio lan bat egin behar da. Honetarako, ikasketa dialogikoaren bitartez komunitatea inflexio puntu batera eraman daiteke ondorengo bidea samurragoa izateko.

Galerak, heriotza eta dolua haurren hezkuntzan

Heriotza bizitzaren parte bat da. Hala ere gaur egun heriotzaren gaia tabu bat da gure gizartean. Hori dela eta, gai honen inguruko alderdi asko ilun samar izaten ditugu gure baitan, era honetan, haurrekin gai hau jorratzeko orduan, hainbat zalantza agertu ohi zaizkigu: zer ulertzen dute haurrek heriotzaz? Zelan hitz egin dezakegu haur batekin gai honen inguruan? Nola lagundu ahal diogu dolu prozesu batean dagoen haur bati? eta abar.

Ikastaro honen bidez, galerak, heriotza eta dolua gaiei helduko diegu. Horretarako gure burua hobeto ezagutzea izango dugu abiapuntua, norberak galera eta doluen inguruan duen esperientziatik eta ezagutzatik, ilun dauden bazterrak argitzen saiatuz eta ondoren haurren galera eta dolu prozesuak hobeto ulertu eta laguntzeko errekurtsoak aurkitzera eramango gaituen hausnarketa teoriko-praktikoa bultzatuko da, gai hau haurrekin nola jorratu aztertzeko xedearekin.

Adimen emozionala eskolan

Zenbait ikertzaileren arabera, gaitasun emozionalak garatzeak ondorio positiboak ekartzen ditu ikaskuntza-prozesuan, haurraren (eta helduaren) ongizatean, baita horrek bere bizitzan aurki ditzakeen oztopo eta arazoen prebentzioan ere. Eta hori posible ez denean, horiei aurre egiteko estrategia egoki eta osasungarriak garatzeko momentuan ere.

Gaur egun, hezkuntzaren helburu nagusia gizabanakoaren garapen integrala bultzatzea da. Hori, haurrak eduki akademikoak barneratzeaz harago doa, gaitasun emozionalak ere garatzen laguntzea eskatzen duelako. Horretarako hezitzaileak gai honi nola heldu eta nondik hasi lantzen pentsatu beharko du.

Irakasleak bere ikasleei adimen emozionala garatzen lagundu diezaien, nahitaezkoa da irakasle bakoitzak bere adimen emozionala lantzea, eta hori abiapuntutzat hartuta emozioen gaiari helduko diogu, bihotza eta burua bateratzen ikasten hasteko, eta eskolan ikasleoi beren gaitasun emozionalen garapenean nola lagundu ikasteko.

Haur eta gazteen transexualitatea ulertzeko gakoak

Ikastaro honek haur eta gazte hauen gizarteratzean erantzunak eta formakuntza eskaintzen dizkie profesionalei, bai lanerako espazioetan, bai aisialdirako espazioetan erabilgarri izango zaizkienak.

Transexualitate-egoeran dauden adingabeko haur eta gazte hauek bizi duten egoera ulertzeko, ikastaroak ezagutza, erremintak eta estrategiak erakutsiko dizkigu.

Ikaskuntza- eta irakaskuntza-prozesuaren errealitate berrian, ikasleei diren eran espresatu eta esplikatzeko aukera zabaltzen ari zaie. Egoera horrek berekin dakartza errealitate horri aurre egin eta tratatzeko zalantza eta ezintasunak.

Transexualitatearen gaia, ikastetxe-mailan, espero den eran esplikatu eta adierazten ez denean, egoera hori bizi duten ikasleekiko etiketatze bat gertatzen ari dela ohartu gara, horrek berekin ekar ditzakeen ondorio guztiekin.

Transexualitateari esker ulertu behar genuke, ikasle bakoitza bakarra dela. Ikastetxeek ikasle bakoitzaren izaerarekiko errespetu hori zaindu beharko lukete.

Ikastaroari buruzko xehetasun gehiago, unibertsitatea.net atarian eginiko elkarrizketa honetan.