Joan den ekainaren 6an, Ziburuk “Aisia hezitzailea elkarrekin eraikiz” jardunaldia hartu zuen. Bertan, Oinherrik, Uda Lekuk eta HUHEZIk elkarlanean garatutako proiektuaren emaitzak eta ikaskuntzak aurkeztu zituzten, aisia hezitzaile euskaldun eta inklusiboaren inguruko hausnarketa eta esperientziak partekatzeko gune bihurtuz.

Goizean, proiektuan parte hartu duten herriekin jardunaldi itxia egin zen. Saio horretan, orain arteko esperientziak elkarbanatu zituzten parte-hartzaileek, eta etorkizunera begira identifikatutako behar eta erronkak jasotzeko aukera izan zuten. Horrez gain, HUHEZIren eskutik aisialdi hezitzaile euskaldun eta inklusiboaren marko teorikoa ezagutzeko saioa ere egin zen.

Arratsaldean, berriz, jardunaldia publiko zabalari ireki zitzaion. Saio irekian aisia hezitzailearen garrantziaz hausnartu zen, baita aisialdia antolatzeko nazioarteko gako nagusien inguruan ere. Era berean, mugaz gaindiko sare-lanketan garatutako metodologien ekarpenak aurkeztu ziren.

Jardunaldiak proiektuaren emaitzak partekatzeko, ikerketaren ondorioak ezagutarazteko, hausnarketarako eta baloraziorako espazioak eskaini zituen. Hala ere, gozamenerako eta kulturaz disfrutatzeko tartea ere izan zen egun osoan zehar.

Izan ere, Ziburuko Euskal Liburu eta Disko Azokaren testuingurua aprobetxatuta, parte-hartzaileek hainbat kultur ekitaldiz gozatzeko aukera izan zuten: zirriborroka saioak, bakarrizketak, azokara bisita eta, besteak beste, Jurgi Ekizaren kontzertua.

Antolatzaileek eskerrak eman dizkiete jardunaldian parte hartu zuten guztiei, bai eta ekimena posible egin zuten eragile eta laguntzaile guztiei ere. Jardunaldiak aisia hezitzailearen inguruko lankidetza eta saretzea indartzeko urrats garrantzitsua izan dela nabarmendu dute.