Aita talde baten hausnarketak
Bakardadea, erruduntasuna, jelosia, ezintasuna… espero ez zituzten emozioei izena jarri diete aitatasuna euren bizitzetako ardatz duten hiru aitek.
Euren seme-alabak jaiotzean aitatasun ideala bertan behera erori zen, eta egunero-egunero, elkarrengan sostengatuz bestelako aitatasun-eredu bat eraikitzen ari dira.
Aitatasuna Montxo Gota Vegaren, Javi Caro Aparaicioren eta Danel Iñurritegi Telleriaren bizitzen ardatz nagusia da.
Lasai, natural, solte hitz egiten dute aitatasunaren inguruko emozioez, bai argienez baina baita ilunenei buruz ere. Bakardadea, jelosia, ezintasuna… hitzetik hortzera ateratzen dira mahaiaren bueltan. “Ez da asko hitz egiten aitok bizi ditugun emozioei buruz, baina geuk ere emozio sakonak bizi izaten ditugu. Neure burua jeloskor sumatu nuen lehen egunean, adibidez, ikaragarri harritu nintzen. Eta, gainera, errudun sentitzen nintzen jeloskor sentitze hutsagatik”. Bat egiten dute Montxok eta Javik Danelen sentimenduekin.
Batak besteari eutsiz, bizipenak partekatuz, irakurketak komentatuz, emozioak landuz, bikotekidearekin hitz eginez, norberarentzat denbora eta espazioa bilatuz… ari dira euren aitatasuna eraikitzen.