Aitzondoko ur-jauzia, Irunen

Aiako Harria Parke Naturalean eta Irun udalerriko Meaka auzoan dagoen ur-jauzia da Aitzondo. Irusta izenarekin ere ezaguna da, eta Ibarla errekaren ibilbidean aurkitzen da. 100 metro behera amiltzen da ura. Garaiaren arabera, ur emaria oso desberdina da.

Ibilbide zirkularreko txangoa egin daiteke Meaka auzoan dagoen Ola sagardotegitik abiatuta. Bost kilometro eskaseko distantzia du. Desnibela 168 metro da, eta zailtasuna ertaina.

Sagardotegi parean bada autoak aparkatzeko lekua eta ibilbideko lehen metroetan hainbat gune daude egurrezko mahaiekin. Sagardotegia ere ia urte osoan zehar egoten da zabalik. Ikusteko modukoa da; izan ere, XIII. mendean burdinola izan zen. Hiru metroko zabalera duten kareharrizko hormak ditu.

Behin abiatu eta hamar bat minutura oinez Irugurutzetako labeetara helduko gara. Meazuri, Meagorri, Aitzondo eta Basakaitzeko inguruetan ateratzen zen burdin karbonatoa kiskaltzen zen Irugurutzetako labeetan. Labeetaraino, bagonetaz edo kableen bidez garraiatzen zuten minerala. Bederatzi labe ere izan ziren martxan, eta Kantauri isurialdeko labetegi handienetakoa izan zen. Bigarren mundu gerrara arte egon zen martxan. Interpretazio zentroa ere badago Irugurutzetan. Bertarainoko bidea irisgarria da edozein ibilgailurentzako.

Basoan barrena

Bide zabala utzi eta baso bidean barneratuko gara Irugurutzetatik aurrera. Ur-jauzirainoko bidean hiru aldapa aurkituko ditugu, eta labeak pasa eta berehala hasten da lehenengoa. Ez da luzea, baina bai aldapatsua. Gora iritsitakoan lautu egiten da berriz ere tarte luze batez.

Paseo atsegin baten ostean dator bigarren puntu aldapatsua. Kasu honetan heldulekuak daude jarrita eskailera itxura duen harkaitz batetik gora egiteko.

Tarte txiki bat bide lauan egin ostean dator hirugarren tarte aldapatsua; ur-jauziaren oinerainokoa da. Honakoa da konplikatuena harkaitz artean delako eta ez dagoelako heldulekurik. Motza da, eta ur-jauzia begi bistan izango dugu haren oineraino iritsi arte.

Itzulera bide beretik hasiko dugu baina heldulekuak zituen igoera goitik behera egin beharrean aurrera jarraituko dugu bide eroso eta zabal batetik. Seinalea badago. Bide horrek eramango gaitu lehenengo basoan zehar eta gero Belbio baserri ingururaino. Hormigoizko bidean ibiliko gara eta Ola sagardotegiraino eramango gaitu.

Argazki askoren iturria hemen

Bidasoa Turismoren lotura hemen