Duela aste batzuk Pirritx, Porrotx eta Marimototsek aurkeztutako materiala
dugu “Amaren intxaurrak”. Ipuin ilustratu batek eta berau kontatu eta abestiz lagundutako CDak osatzen dute.
Hik Hasik, Hil Argi Elkarteak eta Katxiporretak elkarlanean osatutako lana da, Julio Sotok idatzia eta Maite Mutuberriak ilustratua. Abestiei dagokienez, pailazoen errepertorioko abestiak dira, letrista desberdinek idatziak eta Xabier Zabalak nahasiak.


Lan interesgarria da, bereziki, familia eta eskola askorengana iritsiko delako eta ahalik eta gehieni heriotzaz eta doluaz hitz egiteko beldurra gainditzen hasten lagunduko badie ongietorria eman behar zaio.
Egia da ez dela proposamen berritzailea, baina bai zaindutakoa, Sotoren
hitzengatik zein Mutuberriaren ilustrazioengatik. Baina, Heriotza Haurrekinetik eskatu nahi dizueguna zera da, bai liburuaren bai musikaren aurrean haurrak bakarrik ez uzteko. Izan ere, amarena bezain heriotza gogorra plazaratzen duelako eta baita dolua ere.


Beraz, etxeko txikiei Pirritx, Porrotx eta Marimotots gustatzen bazaizkie,
animatu materiala eskuratzera eta beraiekin gozatzera.
Eta egileei eskerrak eman euren zabalkunderako gaitasuna beste behin gai
“zailen” eskura jartzeagatik, kasu honetan guri dagokigun heriotzaren pedagogiaren mesedetan.