Bigarren edizioa da eta Aramaixo Herri Eskolako ikasleekin batera elkartuko dira Maeztuko, Bastidako, Lantziegoko, Gobeako eta Barrundiako ikasleak, herri horiek osatzen baitute sarea; denera, 400 inguru. Trafikoan eragina izango du.

10:30ean iritsiko dira ikasleak eta 10:45ean egingo dute hasiera ekitaldia, eskolan. Ondoren, hainbat ekintza egingo dituzte, taldeetan banatuta, herrian zehar. Haur Hezkuntzako 4-5 urtekoek eta Lehen Hezkuntzako lehen ziklokoek Andra Marira joango dira eta han jolasak egingo dituzte. LHko 2. zikloko ikasleek jolas tradizionalak egingo dituzte parkean eta LHko 3. ziklokoek orientazio-proba izango dute herrian zehar. 13:30ean bazkalduko dute eta 14:45ean amaiera ekitaldia izango da, eskola txikien kanta eta dantzarekin.

Trafikoan eragina

Topaketa dela eta goizeko hamarretatik ordubatera bitartean zirkulazio aldaketak egongo dira herrian zehar. Nardeaga (okindegitik behera), Iturrizuri eta Bizente Goikoetxea plaza itxi egingo dute trafikoarendako. Aramaioko Udaletik adierazi dute sarrera-irteera guztiak Irubidetatik egingo direla.

Mozketa horiek ez dute eragingo autobus zerbitzuan eta betiko ordutegi eta ibilbidea izango du.