Arabako Bertsozale Elkarteak bertsolaritza eta herri inauteriak uztartu nahi izan ditu material didaktikoa sortuz. Izan ere, Bertsozale Elkartearen esanetan, “biak ala biak ondare inmaterial izendapena dute eta kultura eta hizkuntzaren kabi, komunitatearen bilgune dira”.

Arabako herri inauteriak hizkuntza berreskuratu aurretik berreskuratu ziren lurraldean. Horregatik, Zalduondon aurkeztu zuten material didaktikoa, Euskal Herri mailan, euskararen eta inauterien berreskurapenean “gehien berreuskaldundu den herria”.

Material didaktikoa

Herri inauteriak ezagutzeko mapa interaktiboak, ilustrazioek, bost herri inauteritako kanta eta bideo didaktikoek eta bideoklipak osatzen dute material didaktikoa.

Kantuak Arabazozoek sortutakoak dira; bost herri inauterietarako: Asier Otamendik Kuartangokoa, Salcedokoa Manex Agirrek, Eli Zalduak Ilarduia, Egino eta Andoingoa, Zalduondokoa Paula Amilburuk eta Oihane Perea eta Hegoi Amabizkak Kanpezukoa. Herri horietako doinu, dantza eta kantuak hartu dituzte kontuan, bertso sortak sortzerakoan. Bestetik, bertso molde eta doinu berriak ere ekarri dituzte tradiziotik bertsotarako erabilgarri izango direnak.  

Musika, Mikel Goikuriak eta Garikoitz Garciak jarritakoa da; grabazio eta edizio lanak, biolin, gitarra, piano eta baxu doinuak txertatu dituzte. Kolaborazioak ere egin dituzte; hala nola, Nagore Diaz de Cerio trikitilariarekin, Eneko Balantzategi eta Txema Lopez txalapartariarekin eta Unai Losada panderojolearekin. Grabazioak eta bideoklip muntaiak berriz, ALEA hedabideak egin ditu, eta, irudigileak, irriborrozikin (Natxo Vidal) eta Katiux (Amaia Garmendia) izan dira. Hemen ikusgai daude kantu eta bideoklip didaktikoak.